ماتېرىيالى: ئاق ئۈن تۆت چىنە، سۇ ماي 5 جىڭ، باش پىياز بىر باش، كاۋاۋىچىن 20 گىرام، تۇز مۇۋابىق مىقداردا.

　تەييارلاش ئۇسۇلى: پىيازنى يالپاقلاپ توغراپ، كاۋاۋىچىن بىلەن قوشۇپ قاينىتىپ، پىياز بىلەن　كاۋاۋىچىننى سۈزۈۋېتىپ. سۈيى سوۋۇتۇلىدۇ (كاۋاۋىچىن بىلەن پىيازنى قايناتقان سۇ ساڭزىنى چېچەكلىتىش رولىنى ئوينايدۇ). چۈچۈتكەن ياغ سوۋۇتۇلىدۇ. ئۇنغا سوۋۇتۇلغان پىياز سۈيى، كاۋاۋىچىن سۈيىگە تۇز، چۈچۈتۈپ سوۋۇتۇلغان ياغنى قۇيۇپ قاتتىقراق خېمىر يۇغۇرۇلىدۇ. خېمىرنى ياخشى چەيلەپ پىشۇرۇپ، 15 مىنۇت تىندۇرغاندىن كېيىن 35 گىرام چوڭلۇقتا زۇۋۇلا ئۈزۈپ تاۋلاپ، ئازراق ياغلاپ، قۇرۇق داسقا ياكى لېگەنگە ئۈستى-ئۈستىلەپ تىزىپ. ئۈستىنى تەكشى ياغلاپ 15- 20 مىنۇت تىندۇرۇلىدۇ. تىندۇرۇش ۋاقتى ھاۋا كىلىماتى، تۇزنىڭ مىقدارى ۋە خېمىرنىڭ قاتتىق، يۇمشاقلىق دەرىجىسىگە قاراپ بىكىتىلىدۇ.

　تىنغان زۇۋۇلىنىڭ ئوتتۇرىسىدىن باش بارماق بىلەن تۆشۈك ئېچىپ، خېمىرنى ئىككى قولنىڭ ئالىقىنى بىلەن ئېشىپ ھالقىسىمان پىلتە ياساپ، ئۇنى يەنە ئېشىپ ئىنچىكە چوكىنىڭ توملۇقىدەك بولغاندا، ئۇزۇنلۇقىنى 25 سانتىمېتىر قىلىپ، ئىككى تال ئىنچىكە تاياقچىغا ئېلىپ ئالتە- يەتتە دەرىجە قىزىتىلغان ياغقا سېلىپ تەكشى سارغايتىپ پىشۇرۇلىدۇ.

　ئەسكەرتىش: ساڭزىنى پىشۇرۇشتا خېمىرنىڭ چوكىغا چاپلىشىپ قېلىشىدىن ساقلىنىش ئۈچۈن، خېمىرنىڭ چوكىغا ئىلىنىپ تۇرغان ئىككى تەرىپىنى نۆۋەت بىلەن ياغقا بىر قېتىمدىن شۇڭغۇتۇپ سەل قاتۇرۇۋېلىپ، ئاندىن بىر بېشىنى ئوڭغا، بىر بېشىنى سولغا قايرىپ قىڭغىر قاتلاپ ياغقا سېلىۋېتىپ، چوكىنى تارتىۋالىمىز. ساڭزا سەل سارغايغاندا ئالساق بولىدۇ، پىشقان ساڭزىنى ئىسسىق ۋاقتىدىلا لېگەنگە بىر- بىرىگە يېرىم چىشلىتىپ يانتۇ تىزىپ تۇرۇش كېرەك. ساڭزا سېلىشتا ئوت كۈچىگە دىققەت قىلىش لازىم. ياغنىڭ تېمپېراتۇرىسى تۆۋەن بولۇپ قالسا، ساڭزا چېچەكلىمەي قالىدۇ، يۇقىرى بولۇپ كەتسە ساڭزىنىڭ ئىچى خام، تېشى كۆيۈك چىقىدۇ (ياغنىڭ تېمپېراتۇرىسىنى بىلىش ئۈچۈن ساڭزا خېمىرىدىن بىر- ئىككى قۇيماق سېلىپ كۆرۈش لازىم. ياغنىڭ تېمپېراتۇرىسى تەڭشەلگەن بولسا، قۇيماق چېچەكلەپ تەكشى پىشىدۇ).

　ئالاھىدىلىكى: شەكلى كۆركەم، چۈرۈك ھەم مەززىلىك، ئۇيغۇر خەلقىنىڭ ئەنئەنىۋى گېزەكلىرىنىڭ بىر خىلى بولۇپ، كۆبرەك ھېيت- بايراملاردا داستىخانغا قويۇلىدۇ. رەڭگى سېرىق، تەملىك، چۈرۈك، ھېيتلىق داستىخىنىڭىزنىڭ گۈلتاجىسى.

　تەبىئىتى: قۇرۇق ئىسسىق.

　پايدىلانغان مەنبە: شىنجاڭ خەلق نەشرىياتى نەشر قىلغان «يېمەك- ئىچمەك رىسالىسى»ناملىق كىتاب

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)