خۇرۇچلىرى: ئىككى كىلوگىرام ئەتراپىدىكى يەرلىك چاقما كاۋىدىن بىر دانە، كۆك يېمىشتىن 50 گىرام، ئۆرۈك مېغىزىدىن  20 گىرام، ياۋگودىن 20  گىرام، قۇرۇق چىلاندىن 10 گىرام، گۈلىدىن 50 گىرام. ھەسەلدىن 50 گىرام، ناۋاتتىن 100 گىرام، ياڭاق مېغىزىدىن 100 گىرام.

　ئېتىش ئۇسۇلى: 1. كاۋىنىڭ ساپاق تەرىپىدىن دۈگىلەك كېسىپ ئىچىدىكى ئۇرۇقلارنى ئېلىۋېتىپ، پۈتۈن ھالەتتە تەييارلايمىز.  كۆك يېمىش، چىلان، ياۋگو، گۈلە، ياڭاق مېغىزى، ئۆرۈك مېغىزى قاتارلىقلارنى يۇيۇپ، ئىسسىق سۇغا چىلاپ يۇمشىتىمىز، ناۋاتنى چوقۇپ ئۇششاق پارچىلايمىز. 2. كاۋا ئىچىگە پارچىلانغان ناۋات بىلەن چىلاپ قويۇلغان يەل- يېمىشلەرنى ئازراق سۈيى بىلەن سېلىپ، قاسقاندا 30 مىنۇت ئەتراپىدا دۈملەپ، كۈچلۈك ئوتتا پىشۇرىمىز (كاۋا چوڭراق بولسا پىشۇرۇش ۋاقتى ئۇزاقراق، كىچىكرەك بولسا قىسقىراق بولىدۇ. 3. پىشقان كاۋىنىڭ ئىچىگە ھەسەل قۇيۇپ، قىزىتىلغان دۇخوپكىدا 15  مىنۇت تۇرغۇزۇپ، سۈيى قۇرۇغاندا ئېلىپ، ئىستېمال قىلساق بولىدۇ.

　ئەسكەرتىش: كاۋىنى چوڭ- چوڭ پارچىلاپ پىشۇرساقمۇ بولىدۇ. ئىچىگە سالىدىغان يەل- يېمىشلەرنىڭ تېپىلىدىغىنىنى سېلىپ، ياۋگو ئورنىغا بادام، چىلان ئورنىغا جىگدە سېلىپ پىشۇرساقمۇ بولىدۇ. ئەگەر دۇخوپكا بولمىسا قاسقاندا پىشۇرسىمۇ بولىدۇ. لېكىن، كاۋىدىكى ھەسەل دۇخوپكىدا پىشۇرغاندەك قىزىرىپ كۆركەم تۈس ئالماي، سۇلۇقراق بولۇپ قالىدۇ.

　تەبىئىتى: ھۆل ئىسسىق.

پايدىلانغان مەنبە: شىنجاڭ خەلق نەشرىياتى نەشر قىلغان «يېمەك- ئىچمەك رىسالىسى»ناملىق كىتاب

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)