خۇرۇچلىرى: يارما شاپتۇل بىر كىلوگىرام، شېكەر 700 گىرام، لىمون بىر دانە ياكى لىمون جەۋھىرى 2.5 گىرام، شاپتۇل چىلاشقۇدەك سۇ.

　تەييارلاش ئۇسۇلى: 1. شاپتۇلنى يۇيۇپ، سۈرتۈپ، ئىككى پارچە قىلىپ ئۈچكىسىنى ئېلىۋېتىپ، ئۈچ پىرسەنتلىك تۇز سۈيىگە ئىككى- ئۈچ سائەت چىلايمىز، ئاندىن سۇنى ئېقىتىپ چايقاپ، سىرلىق كورىغا سېلىپ، چىلاشقۇدەك سۇ قۇيۇپ بوش ئوتتا ئۇچ مىنۇتچە قاينىتىپ سۈزۈۋېلىپ، سۈيىگە 200 گىرام شېكەر سېلىپ، بوش ئوتتا يەنە 20 مىنۇتچە قاينىتىمىز. 2.سۈزۈۋالغان شاپتۇلنىڭ پوستىنى سويۇپ دەسلەپكى قىيامغا سېلىپ، ئىككى مىنۇتچە قاينىتىپ، ئوتتىن ئېلىپ قويۇپ قويىمىز. 3. 10 سائەتتىن كېيىن يەنە ئوتقا قويۇپ، بوش ئوتتا ئىككى مىنۇتچە قاينىتىپ سۈزۈۋېلىپ. سۈيىگە 200 گىرام شېكەر سېلىپ ئېرىتىپ، بوش ئوتتا 15 مىنۇتچە قاينىتىمىز، ئاندىن سۈزۈۋالغان شاپتۇلنى سېلىپ، بىر مىنۇتچە قاينىتىپ ئوتتىن ئېلىپ قويۇپ قويىمىز. 4. 24 سائەتتىن كېيىن يەنە بوش ئوتتا ئىككى مىنۇتچە قاينىتىپ سۈزۈۋېلىپ، سۈيىگە قالغان 300 گىرام شېكەرنى سېلىپ ئېرىتىپ، ئۇنىڭغا لىمون شىرنىسىنى ياكى لىمون جەۋھىرى ئېرىتمىسىنى قوشۇپ بوش ئوتتا 20 مىنۇتچە قاينىتىمىز، ئاخىرىدا سۈزۈۋالغان شاپتۇلنى سېلىپ بىر- ئىككى مىنۇت قايناتقاندىن كېيىن ئوتتىن ئېلىپ، سىرلىق كورىنىڭ ئاغزىنى ئوچۇق قويۇپ سوۋۇتۇپ ئىستېمال قىلساق بولىدۇ.

　تەسىرى: قاننى كۆپەيتىپ، ساپلاشتۇرىدۇ. تەرەتنى راۋانلاشتۇرىدۇ، قەۋزىيەتكە شىپا قىلىدۇ.

　　تەبىئىتى: ھۆل سوغۇق.

　پايدىلانغان مەنبە: شىنجاڭ خەلق نەشرىياتى نەشر قىلغان «يېمەك- ئىچمەك رىسالىسى»ناملىق كىتاب

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)