خۇرۇچلىرى: قارىيىپ تولۇق پىشقان، چوڭ- چوڭ شاتۇت 500 گىرام، ھەسەل 300 گىرام، شېكەر 300 گىرام، لىمون بىر دانە، سۇ مۇۋاپىق مىقداردا.

　ئېتىش ئۇسۇلى: 1. لىموننى پاكىز يۇيۇپ، ئىككى پارچە قىلىپ سىقىپ، شىرنىسىنى چىقىرىۋالىمىز. 2. شاتۇتنىڭ ساپىقىنى كىچىك قايچا بىلەن كېسىپ تولۇق ئېلىۋېتىپ، سۇ ئېقىتىپ يۇيۇپ، سۈيىنى سارقىتىپ سىرلىق كورىغا بىر قەۋەت شېكەر، بىر قەۋەت شاتۇت تىزىپ، ئۈستىگە قالغان شېكەرنى سېلىپ، سىرلىق كورىنىڭ ئاغزىنى يېپىپ، شېكەر پۈتۈنلەي ئېرىپ بولغۇچە سالقىن جايغا قويۇپ قويىمىز. 3. شاتۇتنى سۈزۈۋېلىپ چىققان شىرنىنىڭ ئەھۋالىغا قاراپ مۇۋاپىق مىقداردا سۇ، لىمون شىرنىسى ۋە ھەسەلنى قوشۇپ بوش ئوتتا قاينىتىمىز. قايناپ قىيامى تەڭشەلگەندە، سۈزۈۋالغان شاتۇتنى سېلىپ، بوش ئوتتا يەنە بەش مىنۇتچە قاينىتىپ ئوتتىن ئالىمىز. سوۋۇغاندا قۇرۇق، پاكىز قاچىغا ئېلىپ، قۇرغاق، سالقىن جايدا ساقلاپ ئىستېمال قىلساق بولىدۇ.

　تەسىرى: سەپرانى پەسەيتىپ، ئىسسىقتىن بولغان كاناي ياللۇغىنى قايتۇرىدۇ، قان بېسىمنى چۈشۈرىدۇ، ئىشتىھانى ئاچىدۇ، ئىچ سۈرۈشنى توختىتىدۇ.

　ئەسكەرتىش: قەۋزىيەت كېسىلى بارلار ئىستېمال قىلماسلىقى كېرەك.

　تەبىئىتى: قۇرۇق سوغۇق.

　پايدىلانغان مەنبە: شىنجاڭ خەلق نەشرىياتى نەشر قىلغان «يېمەك- ئىچمەك رىسالىسى»ناملىق كىتاب

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)