ئانار بۇلۇت\شىنجاڭ گېزىتى خەۋىرى (مۇخبىر جاۋ يۆ)

　3- ئاينىڭ 6- كۈنى، ئۈرۈمچى شەھىرى داۋانچىڭ رايونى دۇڭگۇ يېزىسى ۋېيزى كەنتىدىكى ئۈرۈمچى لۈجوۋ لۇداۋ چارۋا باقمىچىلىق دېھقانلار كەسپىي ھەمكارلىق كوپىراتىپىنىڭ باقمىچىلىق مەيدانىدا، بۇغىلار توپ- توپ بولۇپ قاشا ئىچىدە ئوتلىغاچ سەيلە قىلىۋاتاتتى.

　ئۈرۈمچىدە، داۋانچىڭنىڭ شامىلى كىشىلەرگە ناتونۇش ئەمەس، ئەمما داۋانچىڭدىكى سۇلۇق يەر بويىدىكى چۆلگە يوشۇرۇنغان بۇغا باقمىچىلىق مەيدانى توغرىسىدا بىلىدىغانلىرى ئىنتايىن ئاز.

  ۋېيزى كەنتىدىكى كۆلىمى 450 مو كېلىدىغان لۈجوۋ لۇداۋ ھەمكارلىق كوپىراتىپىدا ھازىر 1200دىن ئارتۇق بۇغا بېقىلىۋاتىدۇ.

　ھەمكارلىق كوپىراتىپىنىڭ مەسئۇلى ما چياڭنىڭ تونۇشتۇرۇشىچە، باقمىچىلىق مەيدانىدا بۇغا باققاندىن باشقا يەنە 300دىن ئارتۇق چىپار بۇغا ۋە ئاق بۇغا بار ئىكەن. ھازىر، بۇ مەيداندا بۇغىنىڭ يۇمران مۈڭگۈزىدىن يىلدا 5 توننا ئېلىنىدىكەن، يىلدا 500دىن ئارتۇق بۇغا مۇزېيى كۆپەيتىلىدىكەن، ئۇنىڭدىن باشقا، بۇغا بىلەن چىپار بۇغىنى شالغۇتلاشتۇرۇپ نەسىل يېتىشتۈرۈش ئوڭۇشلۇق ئېلىپ بېرىلماقتا.

　«ھازىر باقمىچىلىق مەيدانىمىزدا يەنە نۇرغۇن بوغاز بولغان مارال بار، مۆلچەرىمىزچە، بۇ يىل 5- ئايدا بۇغىلارنىڭ سانى كۆپىيىپ 1800گە يېتىشى مۇمكىن.» ما چياڭ مۇنداق دېدى: باقمىچىلىق كۆلىمىمىزنىڭ كېڭىيىشىگە ئەگىشىپ، بۇ يىل ھەمكارلىق كوپىراتىپىمىز بۇغا باش تېما باغچىسى، ئوتتۇرا- باشلانغۇچ مەكتەپ ئوقۇغۇچىلىرىنىڭ پەننى ئومۇملاشتۇرۇش بويىچە تەتقىقات- ئوقۇتۇش بازىسى قۇرۇشقا تەييارلىق قىلىۋاتىمىز.

　«بۇغىنىڭ پۈتۈن يېرى گۆھەر. ھازىر ھەمكارلىق كوپىراتىپىمىزنىڭ بۇغا مەھسۇلاتلىرىدىن بۇغا گۆشى، بۇغىنىڭ يۇمران مۈڭگۈزى، بۇغا ھەمراھى قاتارلىقلار بار، بىز دۆلەت ئىچى ۋە سىرتىدىكى بىيودورا كارخانىلىرى بىلەن ھەمكارلىشىپ، دەسلەپكى بۇغا مەھسۇلاتلىرىنى ئىنچىكە پىششىقلاش ۋە پەن- تېخنىكا جەھەتتە تەتقىق قىلىپ ئېچىش بىلەن شۇغۇللىنىشنى ئۈمىد قىلىمىز». ما چياڭ مۇنداق دېدى: بىز يەنە بۇغا باش تېما قىلىنغان ساياھەتچىلىكنى تەرەققىي قىلدۇرۇش، بۇغا، چىپار بۇغا، ئاق بۇغا قاتارلىقلارغا ئالاقىدار بىلىملەرنى ئومۇملاشتۇرۇشتىن پايدىلىنىپ، تېخىمۇ كۆپ كىشىگە بۇغىنىڭ يۇمران مۈڭگۈزىنىڭ ئىشلەپچىقىرىش جەريانىنى چۈشەندۈرۈپ، ھەمكارلىق كوپىراتىپىمىز بۇغا كەسپىنىڭ يېڭى تەرەققىيات يولى ئۈستىدە ئىزدىنىمىز.