ئانار بۇلۇت\شىنجاڭ گېزىتى مۇخبىرلىرى لۇ فېڭباۋ، خەن چىنيەننىڭ جۇڭگو تۆمۈريول ئۈرۈمچى ئىدارىسى گۇرۇھى چەكلىك شىركىتىدىن ئىگىلىشىچە، 4- ئاينىڭ 2- چۈشتىن بۇرۇن، بىر يۈك پويىزى قەشقەر تۆمۈريول يۈك مەيدانىدىن ئاستا- ئاستا چىقىپ، ئۆزبېكىستاننىڭ تاشكەنتكە يۈرۈپ كەتكەن. بۇ، بۇ يىل تۇنجى قېتىم قاتنىغان قەشقەردىن تاشكەنتكە بارىدىغان ئوتتۇرا ئاسىيا نۆۋەتچى پويىزى ئىكەن.

بۇ ئوتتۇرا ئاسىيا نۆۋەتچى پويىزىغا 1500 توننا رەخت، كۈندىلىك تۈرلۈك ماللار قاتارلىق يۈك لىق قاچىلانغان بولۇپ، قورغاس پورتى ئارقىلىق چېگرادىن چىقىپ، تەخمىنەن 4500 كىلومېتىر ئومۇمىي مۇساپىنى بېسىپ، 12 كۈندە مەنزىلگە يېتىپ بېرىشى مۆلچەرلەندى.

«بۇ قېتىمقى ئوتتۇرا ئاسىيا نۆۋەتچى پويىزىنىڭ قاتنىشى شىركىتىمىزنىڭ تاۋار پۈتۈشۈش مىقدارىنى ئاشۇرىدۇ ھەم قەشقەرنىڭ يەرلىك مەھسۇلاتلىرىنىڭ چەت ئەللەرگە سېتىلىشىغا ئۈنۈملۈك تۈرتكە بولۇپ، ئۆلچىمى تېخىمۇ يۇقىرى، مال مەنبەسى تېخىمۇ كەڭ، تەسىرى تېخىمۇ چوڭ بولغان خەلقئارا ئەشيا ئوبوروتى چوڭ يولىنى شەكىللەندۈرىدۇ» دېدى شىنجاڭ كاشۈن خەلقئارا سودا چەكلىك شىركىتىنىڭ مەسئۇلى ئابدۇئەلى ئابدۇرۇسۇل.

بۇ قېتىمقى نۆۋەتچى پويىزنىڭ قاتنىشى دۆلەت ئىچى، خەلقئارادىكى قوش ئايلىنىشقا يەنىمۇ كۈچ قوشۇپ، ئوتتۇرا ئاسىيا نۆۋەتچى پويىز تىرانسپورت سىستېمىسىنى مۇكەممەللەشتۈرۈپ، قەشقەر ۋىلايىتى بىلەن يىپەك يولى ئىقتىساد بەلبېغى بويىدىكى دۆلەتلەرنىڭ ئىقتىساد سودا ئالاقىسىنى قويۇقلاشتۇرۇپ، قەشقەر ۋىلايىتى، ھەتتا شىنجاڭ، پۈتۈن مەملىكەتتىكى تاۋارلارنى «سىرتقا چىقىرىش»نى تېخىمۇ كۆپ تاللاش بىلەن تەمىنلەيدۇ.

يېقىنقى يىللاردىن بۇيان، قەشقەر ۋىلايىتى سىياسەت پۇرسىتىنى چىڭ تۇتۇپ، رايون ئورنى، بايلىق، كەسىپ ئەۋزەللىكىگە تايىنىپ، «بىر بەلباغ، بىر يول» قۇرۇلۇشىغا پائال مۇلازىمەت قىلىپ ۋە ئۇنىڭغا سىڭىشىپ، سىرتقا ئېچىۋېتىش چوڭ يولىنى ئۈزلۈكسىز بەرپا قىلىپ، تۈرلۈك مەھسۇلاتلارنىڭ ئىمپورت- ئېكسپورت كۆلىمىنى تېز ئاشۇرۇپ، تاشقى سودا تەرەققىيات سەۋىيەسىنى ئۈزلۈكسىز ئۆستۈردى. بۇ يىل 1- ئاي، 2- ئايدا، قەشقەر ۋىلايىتىنىڭ «بىر بەلباغ، بىر يول» بويىدىكى دۆلەتلەر بىلەن بولغان ئىمپورت- ئېكسپورت سودا سوممىسى 8 مىليارد 750 مىليون يۈەن بولۇپ، بۇلتۇرقى ئوخشاش مەزگىلدىكىدىن %68.6 ئاشتى.

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)