شىنخۇا ئاگېنتلىقى، بېيجىڭ، 1- ئاينىڭ 1- كۈنى تېلېگراممىسى 1- ئاينىڭ 1- كۈنى، دۆلەت رەئىسى شى جىنپىڭ بىلەن ئامېرىكا زۇڭتۇڭى بايدېن ئۆزئارا تەبرىك خېتى ئەۋەتىپ، ئىككى دۆلەت دىپلوماتىك مۇناسىۋەت ئورناتقانلىقىنىڭ 45 يىللىقىنى تەبرىكلىدى.

　شى جىنپىڭ تەبرىك خېتىدە مۇنداق كۆرسەتتى: جۇڭگو بىلەن ئامېرىكىنىڭ دىپلوماتىك مۇناسىۋەت ئورناتقانلىقى ئىككى دۆلەت مۇناسىۋىتى تارىخى ۋە خەلقئارا مۇناسىۋەت تارىخىدىكى چوڭ ئىش. 45 يىلدىن بۇيان، جۇڭگو- ئامېرىكا مۇناسىۋىتى بوران- چاپقۇنلارنى باشتىن كەچۈرۈپ، ئومۇمىي جەھەتتىن ئالغا قاراپ تەرەققىي قىلىپ، ئىككى دۆلەت خەلقلىرىنىڭ بەخت- سائادىتىنى ئاشۇرۇش بىلەن بىللە، يەنە دۇنيانىڭ تىنچلىقى، مۇقىملىقى ۋە گۈللىنىشىنى ئىلگىرى سۈردى. تارىخ شۇنى ئىسپاتلىدى ھەم داۋاملىق تولۇق ئىسپاتلايدۇكى، ئۆزئارا ھۆرمەت قىلىش، تىنچ بىللە تۇرۇش، ھەمكارلىشىپ تەڭ نەپ ئېلىشتا چىڭ تۇرۇش جۇڭگو- ئامېرىكا ئىككى چوڭ دۆلەتنىڭ توغرا چىقىشىپ ئۆتۈش يولى، بۇ، يېڭى دەۋردىكى جۇڭگو- ئامېرىكا ئىككى تەرەپنىڭ ئورتاق تىرىشىش يۆنىلىشى بولۇشى كېرەك.

　شى جىنپىڭ مۇنداق كۆرسەتتى: مەن زۇڭتۇڭ بايدېن بىلەن سان فىرانسىسكودا ئۇچرىشىپ، كەلگۈسىگە يۈزلەنگەن «سان فىرانسىسكو مەنزىلى»نى ئېچىپ، جۇڭگو- ئامېرىكا مۇناسىۋىتىنىڭ تەرەققىياتى ئۈچۈن يۆنىلىشنى ئېنىق كۆرسىتىپ بەردۇق. ئىككى تەرەپ ئىككى دۆلەت باشلىقلىرى ھاسىل قىلغان مۇھىم ئورتاق تونۇش ۋە نەتىجىلەرنى ئەستايىدىل ئەمەلىيلەشتۈرۈپ، ئەمەلىي ھەرىكىتى ئارقىلىق جۇڭگو- ئامېرىكا مۇناسىۋىتىنىڭ مۇقىم، ساغلام، ئىمكانىيەتلىك سىجىل تەرەققىياتىغا تۈرتكە بولۇشى كېرەك.

　شى جىنپىڭ مۇنداق تەكىتلىدى: مەن بايدېن زۇڭتۇڭ بىلەن ئورتاق تىرىشىپ، داۋاملىق تۈردە جۇڭگو- ئامېرىكا مۇناسىۋىتى ئۈچۈن رول تۇتۇپ يول باشلاپ، جۇڭگو- ئامېرىكا ئىككى دۆلەت ۋە ئىككى دۆلەت خەلقلىرىگە بەخت يارىتىپ، دۇنيانىڭ تىنچلىقى ۋە تەرەققىيات ئىشلىرىنى ئىلگىرى سۈرۈشنى خالايمەن.

　بايدېن تەبرىك خېتىدە مۇنداق بىلدۈردى: 1979- يىلى دىپلوماتىك مۇناسىۋەت ئورناتقاندىن بۇيان، ئامېرىكا بىلەن جۇڭگو ئوتتۇرىسىدىكى مۇناسىۋەت ئامېرىكا، جۇڭگو ۋە پۈتۈن دۇنيانىڭ گۈللىنىشىنى ئىلگىرى سۈردى ھەم پۇرسەت ياراتتى. مەن بۇ مۇھىم مۇناسىۋەتنى مەسئۇلىيەتچانلىق بىلەن باشقۇرۇشقا كۈچ چىقىرىمەن. مەن ئىلگىرىكى رەھبەرلىرىمىز ھەم بىز كۆپ قېتىم ئۇچرىشىش ۋە مۇزاكىرە قىلىش ئارقىلىق قولغا كەلتۈرگەن ئىلگىرىلەش ئاساسىدا ئامېرىكا- جۇڭگو مۇناسىۋىتىنى داۋاملىق ئالغا سىلجىتىشنى ئۈمىد قىلىمەن.