ئانار بۇلۇت \ شىنجاڭ گېزىتى خەۋىرى (مۇخبىر ئۆتكۈر نىجات فوتوسى، خەۋىرى) «نەسلى ياخشىلانغان بۇ قىرغىز قويلىرىنىڭ ئوتتۇرىچە بەدەن ئېغىرلىقى 20 كىلوگىرام ئەتراپىدا ئاشقان بولۇپ، يەرلىك قوي بېقىشقا سېلىشتۇرغاندا، پايدىسى %50 ئاشتى» دېدى ئاتۇش شەھىرى تۈگۈرمىتى يېزىسى مەيدان كەنتىدە ئولتۇرۇشلۇق ئايساباي جاقىپ قوتاندىكى قىرغىز قويلىرىنى كۆرسىتىپ خۇشال ھالدا.

　2- ئاينىڭ 25- كۈنى، مۇخبىر ئاتۇش شەھىرى تۈگۈرمىتى يېزىسى مەيدان كەنتىگە كىرگىنىدە، يول بويىدىكى رەتلىك سېلىنغان دېھقانلار ھويلىسىدىن قويلارنىڭ مەرىگەن ئاۋازلىرى ئاڭلىنىپ تۇراتتى، ئۇ ئايساباي جاقىپنىڭ ھويلىسىدىكى قوتاننىڭ ئىشىكىنى ئېچىپ، بۇ قوتاندىكى چوڭ- كىچىك سېمىز قىرغىز قويلىرىنى كۆردى. بۈگۈنكى كۈندە، ئايساباي بىر كەسپىي باقمىچىلىق تېخنىكى، كۆپچىلىكنىڭ قەلبىدىكى ئىسمى جىسمىغا لايىق «قويچى ئۇستام»غا ئايلانغان بولۇپ، كەنت ئاھالىلىرى ئۇنىڭدىن مەسلىھەت سورايتتى.

　ئايساباي كەنت بويىچە تۇنجى تۈركۈمدە قىرغىز قويىنىڭ نەسلىنى ياخشىلاشقا قاتناشقان باقمىچى ئائىلىسى بولۇپ، ئۇ باققان قويلاردىن 85 تۆل ئالدى. «ئالدىنقى ئايدا مەن 30 پاخلان ساتتىم، بىر پاخلاننى 1050 يۈەنگە سېتىپ، 30 مىڭ يۈەندىن ئارتۇق كىرىم قىلدىم». ئايساباي سۆزلىگەچ يەم- خەشەك تەييارلاۋاتاتتى، بىر توپ قوزىلار ئۇنىڭ ئەتراپىغا ئولىشىۋېلىپ، ئارىلاپ- ئارىلاپ مەرىشىپ قوياتتى. يېقىنقى يىللاردىن بۇيان، ئايساباي باقمىچىلىقتىن قىلغان كىرىمى ئارقىلىق قوي ۋە يەم- خەشەك توشۇشقا ئىشلىتىلىدىغان يۈك ئاپتوموبىلىدىن بىرنى سېتىۋالدى، يەنە ئەسلىدىكى 80 كىۋادرات مېتىرلىق ئۆيىنى 200 كىۋادرات مېتىرغا كېڭەيتىپ سالدى، ئۇ ئائىلىسىدىكىلەر بىلەن مەسلىھەتلىشىپ يەنە ئائىلىدە ئىشلىتىدىغان پىكاپتىن بىرنى ئېلىشنىمۇ پىلانلىدى.

　«ھازىر ئۆيۈمدە 120 قوي ۋە 20 كالا بار. بۇنىڭدىن كېيىن، مەن يەنە باقمىچىلىق كۆلىمىنى كېڭەيتىپ، كۆپچىلىككە ئىلمىي بېقىش تېخنىكىسىنى ئۆگىتىپ، بورداش مەزگىلىنى قىسقارتىپ، قوتاندىن چىقىش نىسبىتىنى ئۆستۈرۈپ، كىرىمنى ئاشۇرىمەن»، دېدى ئايساباي تولۇپ تاشقان ئىشەنچ بىلەن.

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)