ئانار بۇلۇت \شىنجاڭ گېزىتى خەۋىرى (مۇخبىر ۋاڭ شىڭرۇي) ئاپتونوم رايونلۇق پارتىيە كومىتېتىنىڭ شۇجىسى ما شىڭرۇي 6- ئاينىڭ 12- كۈنى شىنجاڭ ئورمان ئوت ئۆچۈرۈش باش ئەترىتى، دۆلەت كومپيۇتېر تورى ۋە ئۇچۇر بىخەتەرلىكى باشقۇرۇش مەركىزى شىنجاڭ شۆبە مەركىزىدە زىيارەتتە بولدى، تەكشۈرۈپ تەتقىق قىلدى، ئالاقىدار خىزمەتلەرنىڭ قانات يايدۇرۇلۇش ئەھۋالىنى چوڭقۇر ئىگىلىدى، ئۇلارنىڭ ئۇزاقتىن بۇيان شىنجاڭ خىزمىتىگە كۆڭۈل بۆلگەنلىكىگە ۋە قوللىغانلىقىغا رەھمەت ئېيتتى، مەركەزنىڭ شىنجاڭدىكى ئورۇنلىرىنىڭ باش شۇجى شى جىنپىڭنىڭ ۋە پارتىيە مەركىزىي كومىتېتىنىڭ تەدبىر- ئورۇنلاشتۇرمىلىرىنى چوڭقۇر ئىزچىللاشتۇرۇپ، ئەمەلىيلەشتۈرۈپ، دىققەتنى ئاساسىي مەسئۇلىيەت، ئاساسىي كەسىپكە مەركەزلەشتۈرۈپ، مەسئۇلىيەتنى پائال زىممىگە ئېلىپ نەتىجە يارىتىپ، تېخىمۇ ياخشى ھالدا مەركىزىي خىزمەتنى چۆرىدەپ، ئومۇمىي ۋەزىيەتكە مۇلازىمەت قىلىپ، شىنجاڭنىڭ يۇقىرى سۈپەتلىك تەرەققىياتى ۋە ئەبەدىي ئەمىنلىكىنى ئالغا سىلجىتىش داۋامىدا تېخىمۇ زور رولىنى جارى قىلدۇرۇشىنى ئۈمىد قىلدى.

　شىنجاڭ ئورمان ئوت ئۆچۈرۈش باش ئەترىتىدە، ما شىڭرۇي خەۋەرلىشىش قوماندانلىق ئاپتوموبىلىنى ئىشلىتىش ۋە يۈرۈشتۈرۈش ئەھۋالىنى ئىگىلىدى، باش ئەترەتنىڭ باش شۇجى شى جىنپىڭنىڭ تەلىم سۆزىنىڭ روھىنى ئەمەلدە كۆرسىتىش نەتىجىلىرى كۆرگەزمە سارىيىغا كىرىپ، قوشۇننىڭ ئىسلاھ قىلىپ تۈزۈلمە ئۆزگەرتىش ۋە تۈرلۈك خىزمەتلەرنى قانات يايدۇرۇش ئەھۋالىنى تەپسىلىي ئىگىلىدى، قوماندانلىق مەركىزىدە خىزمەت تونۇشتۇرۇشىنى ئاڭلىدى، كۆپچىلىك بىلەن چوڭقۇر پىكىر ئالماشتۇرۇپ، شىنجاڭ ئورمان ئوت ئۆچۈرۈش باش ئەترىتىنىڭ باش شۇجىنىڭ سەمىمىي تاپشۇرۇقىنى ئەستە چىڭ ساقلاپ، «پارتىيەگە سادىق بولۇش، ئىنتىزامدا قاتتىق بولۇش، خەۋپ- خەتەردىن قورقماسلىق، پۈتۈن ۋۇجۇدى بىلەن خەلق ئۈچۈن خىزمەت قىلىش» مۇھىم تەلىپىنى چوڭقۇر ئەمەلدە كۆرسىتىپ، شىنجاڭنىڭ ئورمان ئوت ئاپىتىدىن مۇداپىئەلىنىش ۋە تۈرلۈك ئاپەتتىن مۇداپىئەلىنىش، قۇتقۇزۇش- ياردەم بېرىش ئەمەلىيىتىگە بىرلەشتۈرۈپ، كەسپىي قۇتقۇزۇش- ياردەم بېرىش كۈچلىرىنىڭ ئەۋزەللىكى ۋە رولىنى تېخىمۇ ياخشى جارى قىلدۇرۇپ، يەرلىكتىكى تارماقلار بىلەن ھەمكارلىشىشنى كۈچەيتىپ، شىنجاڭنىڭ ئاپەتتىن مۇداپىئەلىنىش، ئاپەت زىيىنىنى ئازايتىش، ئاپەتتىن قۇتقۇزۇش ئىقتىدارىنى ئۈزلۈكسىز ئۆستۈرۈشىگە، خەلقنىڭ ھاياتى، مال- مۈلۈك بىخەتەرلىكىنى قوغداشقا كۈچ قوشۇشىنى ئۈمىد قىلدى.

　دۆلەت كومپيۇتېر تورى ۋە ئۇچۇر بىخەتەرلىكى باشقۇرۇش مەركىزى شىنجاڭ شۆبە مەركىزىدە ما شىڭرۇي ئالاقىدار باشقارما، ئىشخانىلارنىڭ خىزمەت ئەھۋالىنى كۆزدىن كەچۈردى، تور بىخەتەرلىكىنى ئۇنىۋېرسال باشقۇرۇش سۇپىسى ئارقىلىق، تور بىخەتەرلىكىنى نازارەت قىلىش- باشقۇرۇش ئەھۋالى توغرىسىدىكى ئانالىز، تونۇشتۇرۇشنى ئاڭلىدى، تۈرلۈك خىزمەتلەرنىڭ ئىلگىرىلەش ئەھۋالىنى تەپسىلىي ئىگىلىدى، مەركەزنىڭ ئۆز ئەۋزەللىكىنى تېخىمۇ ياخشى ھالدا شىنجاڭنىڭ ئىدېئولوگىيە بىخەتەرلىكىنى قوغداش، ئەبەدىي ئەمىنلىكنى ئالغا سىلجىتىشتىكى نۇقتىلىق خىزمەتلىرى بىلەن زىچ بىرلەشتۈرۈپ، خىزمەتنىڭ كۈچەش نۇقتىسى ۋە كۈچ سەرپ قىلىش نۇقتىسىنى يەنىمۇ ئىلگىرىلىگەن ھالدا توغرا تېپىپ چىقىپ، ئاكتىپ كۈچنى مۇجەسسەملەشتە چىڭ تۇرۇپ، توردىكى شىنجاڭغا ئالاقىدار خاتا ئۇچۇرلارغا پائال تاقابىل تۇرۇپ، تور بىخەتەرلىكى خەۋپ- خەتەر يوشۇرۇن خەۋپىنىڭ ئۈنۈملۈك ئالدىنى ئېلىپ ۋە ئۇنى تۈگىتىپ، تور بوشلۇقىنىڭ بىخەتەرلىكى، مۇقىملىقىنى ھەقىقىي قوغداپ، شىنجاڭنىڭ تورنى باشقۇرۇش، تورنى ئىدارە قىلىش ئىقتىدارى، سەۋىيەسىنى ئۈزلۈكسىز ئۆستۈرۈپ، يېڭى مۇساپىدە گۈزەل شىنجاڭ قۇرۇپ چىقىش ئۈچۈن پاكىز، تەرتىپلىك تور مۇھىتى بەرپا قىلىشىنى، پۇختا، كۈچلۈك ئۇچۇر بىخەتەرلىكى كاپالىتى بىلەن تەمىنلىشىنى ئۈمىد قىلدى.