مەملىكەتلىك پەن- تېخنىكا يىغىنى، دۆلەت پەن- تېخنىكا مۇكاپاتى يىغىنى ۋە جۇڭگو پەنلەر ئاكادېمىيەسىنىڭ 21- قېتىملىق ئاكادېمىكلار يىغىنى، جۇڭگو ئىنژېنېرلار ئاكادېمىيەسىنىڭ 17- قېتىملىق ئاكادېمىكلار يىغىنى 6- ئاينىڭ 24- كۈنى چۈشتىن بۇرۇن خەلق سارىيىدا داغدۇغىلىق ئېچىلدى. جۇڭگو كوممۇنىستىك پارتىيەسى مەركىزىي كومىتېتىنىڭ باش شۇجىسى، دۆلەت رەئىسى، مەركىزىي ھەربىي كومىتېتنىڭ رەئىسى شى جىنپىڭ يىغىنغا قاتنىشىپ، دۆلەت ئالىي پەن- تېخنىكا مۇكاپاتىغا ئېرىشكۈچىلەرگە مۇكاپات تارقىتىپ بەردى ھەم مۇھىم سۆز قىلدى.

ئىككى ئاكادېمىيەنىڭ ئاكادېمىكى، ۋۇخەن داشۆنىڭ پىروفېسسورى لى دېرېن نەچچە ئون يىلنى بىر كۈندەك ئۆتكۈزۈپ، جۇڭگونىڭ ئۆلچەش- سىزىش، يىراقتىن سېزىش ئارقىلىق يەر شارىنى كۆزىتىش سەۋىيەسىنى ئۆستۈرۈشكە كۈچ چىقاردى. سۈنئىي ھەمراھ بىلەن يىراقتىن سېزىش ئارقىلىق پۈتۈن يەر شارى بويىچە يۇقىرى ئېنىقلىقتا ئورۇن بەلگىلەش ھەم خەرىتە سىزىش يادرولۇق تېخنىكىسىدا بۆسۈش ھاسىل قىلىشتىن، يىراقتىن سېزىش سۈنئىي ھەمراھى تەسۋىرىنى يۇقىرى ئېنىقلىقتا بىر تەرەپ قىلىشتىكى بىر قاتار قىيىن مەسىلىلەرنى ھەل قىلىشقىچە، كوللېكتىپنى باشلاپ تولۇق ئاپتوماتىك يۇقىرى ئېنىقلىقتىكى ئاۋىياتسىيە ۋە يەر يۈزى ئۆلچەش سىستېمىسىنى تەتقىق قىلىپ ئېچىشقىچە، جۇڭگولۇقلارنىڭ «ئالەم بوشلۇقىنى كۈزىتىش- ئۆلچەش» مۇساپىسىدە، لى دېرېن ئەسلا توختاپ قالمىدى.

جۇڭگو پەنلەر ئاكادېمىيەسىنىڭ ئاكادېمىكى، چىڭخۇا داشۆنىڭ پىروفېسسورى شۆ چىكۇن قېتىشىش ھالىتى فىزىكىسى ساھەسىدىكى داڭلىق ئالىم بولۇپ، كوللېكتىپنى باشلاپ كىۋانت نورمالسىزلىقى خول ئېففېكتىنى تۇنجى قېتىم كۆزىتىپ، گېتېروجۇنكسىيە تېگىشىش يۈزىنىڭ يۇقىرى تېمپېراتۇرىلىق سۇپېر توك ئۆتكۈزۈشچانلىقىنى تۇنجى قېتىم بايقىدى... ئۇ نۇرغۇن قېتىملىق مۇھىم ئىلمىي بايقاشلار ئارقىلىق، جۇڭگونىڭ كىۋانت ئىلمى تەتقىقاتىنىڭ دۇنيا بويىچە بىرىنچى سەپكە كىرىشىگە ياردەم بەردى.

جۇڭگو پەنلەر ئاكادېمىيەسى فىزىكا تەتقىقات ئورنىدىن فاڭ جۇڭ، دەي شى، ۋېڭ خۇڭمىڭ، يۈ رۇي، ۋاڭ جىجۈن كوللېكتىپىنىڭ «توپولوگىيەلىك ئېلېكتىرونلۇق ماتېرىيال ھېسابلاش ۋە ئالدىن مۆلچەرلەش»تىن ئىبارەت بۇ تەتقىقات نەتىجىسى دۆلەت تەبىئىي پەن مۇكاپاتى بويىچە 1- دەرىجىلىك مۇكاپاتقا ئېرىشتى. بۇ كوللېكتىپ ئۆزگىچە ھېسابلاش ئۇسۇلىنى تەرەققىي قىلدۇرۇش ئارقىلىق، ھېسابلاش- ئالدىن مۆلچەرلەش ئارقىلىق بىر قانچە مۇھىم توپولوگىيەلىك ئېلېكىترونلۇق ماتېرىيال سىستېمىسىنى مۇۋەپپەقىيەتلىك بايقاپ، يېقىنقى يىللاردىن بۇيانقى توپولوگىيەلىك ئېلېكتىرونلۇق ھالەت تەتقىقات ساھەسىنىڭ ھالقىما تەرەققىياتىغا تۈرتكە بولدى، شۇنداقلا دۆلىتىمىزنى بۇ تەتقىقات ساھەسىدە خەلقئارادا ئەڭ ئالدىنقى قاتاردا تۇرۇش ئىمكانىيىتىگە ئىگە قىلدى.

مۇخبىرلار: جۈ پېڭ، شيې خۇەنچى، جىن لىۋاڭ، شيۇڭ چى

مۇھەررىرلەر: جاڭ يەن، بى شياۋياڭ، يۈ دۇڭشېڭ، لۇ يې، جوۋ دىشياۋ

شىنخۇا ئاگېنتلىقى فوتو سۈرەت بۆلۈمى ئىشلىگەن

شىنخۇا ئاگېنتلىقى 1- خىزمەت ئىشخانىسى چىقارغان

پايدىلانغان مەنبە: شىنخۇا ئاگېنتلىقى ئابۇنىچىلار تېرمىنالى

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)