2017- يىلى، ئۇ بېيجىڭ پۈتۈن مۇساپىلىك مارافونچە يۈگۈرۈش مۇسابىقىسىگە تۇنجى قېتىم قاتنىشىپ، تۆت سائەت 23 مىنۇت 43 سېكۇنتلۇق نەتىجە ياراتتى؛ 2020- يىلى نەنجىڭ مارافونچە يۈگۈرۈش مۇسابىقىسىدە، ئۇ ئۆزىنىڭ ئىككى سائەت 25 مىنۇت 55 سېكۇنتلۇق ئەڭ ياخشى نەتىجىسى بىلەن مۇسابىقىنى تاماملىدى. پارىژ ۋاقتى 8- ئاينىڭ 10- كۈنى، بېيجىڭلىق 39 ياشلىق تېز يوللانما يەتكۈزگۈچى لۇەن يۈشۇەي ئولىمپىك تەنھەرىكەت مۇسابىقىسى ئاممىۋى گۇرۇپپىنىڭ پۈتۈن مۇساپىلىك مارافونچە يۈگۈرۈش مۇسابىقىسىگە قاتنىشىدۇ. ئۇ ئادەتتە تېز يوللانمىنى يۈگۈرۈپ يەتكۈزىدۇ، مۇشۇنداق يۈگۈرۈپ يۈرۈپ پارىژ ئولىمپىك تەنھەرىكەت مۇسابىقىسىگە قاتنىشىدىغان بولدى. 

　2024- يىللىق پارىژ ئولىمپىك تەنھەرىكەت مۇسابىقىسىدە ئولىمپىك تەنھەرىكەت مۇسابىقىسى تارىخىدا تۇنجى قېتىم ئاممىۋى گۇرۇپپىنىڭ مارافونچە يۈگۈرۈش مۇسابىقىسى تەسىس قىلىندى، پۈتۈن يەر شارى بويىچە 800 مىڭدىن ئارتۇق ئادەم تىزىمغا ئالدۇردى، ئاخىرىدا پەقەت 40 مىڭدىن ئارتۇق يۈگۈرگۈچىگە مۇۋەپپەقىيەتلىك ھالدا چەك چىقتى، لۇەن يۈشۇەي شۇلارنىڭ بىرى ئىدى.

　لۇەن يۈشۇەي جىڭدۇڭنىڭ تېز يوللانما يەتكۈزگۈچىسى، جىڭدۇڭ 2017- يىللىق بېيجىڭ مارافونچە يۈگۈرۈش مۇسابىقىسىگە ئەشيا ئوبوروت ياردەم بەرگۈچى سودىگەر بولغاچقا، ئۇنىڭ تۇنجى قېتىم مارافونچە يۈگۈرۈش مۇسابىقىسى بىلەن رىشتى چىگىلىپ، ياردەم بەرگۈچى سودىگەرلەرگە بېرىلىدىغان قىممەتلىك بىر سانغا ئېرىشكەن.

　گەرچە جىلىن جىئەندىكى يۇرتىدا باشلانغۇچ مەكتەپتە ئوقۇۋاتقان چاغدا، لۇەن يۈشۇەي مەكتەپ تەنھەرىكەت مۇسابىقىسىنىڭ سەككىز يۈگۈرۈش تۈرىدە چېمپىيون بولغان بولسىمۇ، لېكىن ئەزەلدىن مارافونچە يۈگۈرۈپ باقمىغان، سىناپ بېقىش ئويى بىلەن، ئۇ بېيجىڭ مارافونچە يۈگۈرۈش مۇسابىقىسىگە تەييارلىق قىلىشقا باشلىغان. كۈندۈزى تېز يوللانما يەتكۈزسە، كەچتە ۋاقتى بولسىلا سىرتقا چىقىپ بىردەم يۈگۈرگەن، ئەمما ۋاقىت قىس، خىزمەت ئالدىراش بولغاچقا، بېيجىڭ مارافونچە يۈگۈرۈش مۇسابىقىسىگە قاتنىشىشتىن بۇرۇن، ئۇ 70 - 80 كىلومېتىرلا مەشىق قىلالىغان.

　لۇەن يۈشۇەي «مۇسابىقىنى تاماملىساملا بولدى» دېگەن روھىي ھالەتتە، مۇسابىقە يولى بويىدىكى خىزمەتداشلىرى ۋە پىدائىيلارنىڭ مەدەت بېرىشى بىلەن تۆت سائەت 23 مىنۇت 43 سېكۇنتلۇق نەتىجە بىلەن مۇسابىقىنى تاماملىغان. «مېنىڭ ئەينى ۋاقىتتىكى مۇسابىقىگە قاتنىشىش نومۇرۇم F2343 ئىدى، نەتىجەم دەل 4 سائەت 23 مىنۇت 43 سېكۇنت بولدى، مارافونچە يۈگۈرۈشكە قاتنىشىش پېشانەمگە پۈتۈلگەن بولسا كېرەك»، دېدى لۇەن يۈشۇەي.

　كۈندۈزى يۈگۈرۈپ تېز يوللانما يەتكۈزىدۇ، كەچتە يۈگۈرۈپ مەشىق قىلىدۇ، ھازىرغا قەدەر پۈتۈن مۇساپىلىك ۋە يېرىم مۇساپىلىك مۇسابىقىلەرنى قوشقاندا، لۇەن يۈشۇەي 40 نەچچە مەيدان مارافونچە يۈگۈرۈش مۇسابىقىسىگە قاتناشتى.

　2021- يىلى، لۇەن يۈشۇەي پارىژ ئولىمپىك تەشكىلىي كومىتېتىنىڭ ئاممىۋى مارافونچە يۈگۈرۈش مۇسابىقىسى تەسىس قىلىش توغرىسىدىكى ئۇقتۇرۇشىنى تاسادىپىي كۆرۈپ قالدى. ئۇنىڭ بۇ پۇرسەتنى قولدىن بېرىپ قويغۇسى يوق ئىدى، شۇنىڭ بىلەن تەرجىمە يۇمشاق دېتالى ئارقىلىق تىزىملىتىش تەلىپىنى ئوقۇپ، تەنھەرىكەت خاتىرىسىنى يوللاپ، چەك تارتىش ئۈچۈن جۇغلانما نومۇر توپلىدى ... بۇ يىل باھار بايرىمىنىڭ ھارپا ئاخشىمى لۇەن يۈشۇەي ئاخىرى پارىژ ئولىمپىك تەنھەرىكەت مۇسابىقىسى تەشكىلىي كومىتېتىنىڭ پوچتا يوللانمىسىنى تاپشۇرۇپ ئالدى، ئۇ 40 مىڭدىن ئارتۇق تەلەيلىك ئادەمنىڭ بىرى بولۇپ قالدى.

　«ئىلگىرى تېلېۋىزوردا ئولىمپىك تەنھەرىكەت مۇسابىقىسىنى كۆرەتتىم، ئۆزۈمنىڭمۇ قاتنىشىدىغانلىقىمنى ئەزەلدىن ئويلاپ باقمىغان ئىدىم»، لۇەن يۈشۇەينىڭ چېھرىدىن خۇشاللىق چىقىپ تۇراتتى، «ئادەتتىكى كىشىلەرنىڭ قاتنىشىشى، مېنىڭچە، دەل ئولىمپىك روھىنىڭ بىر خىل ئىپادىسى. يېقىندا ئۆزۈمنىڭ ھالىتىنى ياخشى تەڭشەيمەن. پارىژغا بارغاندىن كېيىن، مەن ئولىمپىك تەنھەرىكەت مۇسابىقىسى مەيدانىدا باسقان ھەر بىر قەدەمدىن ھۇزۇرلىنىمەن».

　فوتوگراف: جۈ خۇەنزۇڭ

　مۇھەررىرلەر: لو يۈەن، سۇڭ يەنخۇا، دىڭ شۈ

　پايدىلانغان مەنبە: شىنخۇا ئاگېنتىقى ئابۇنىچىلار تېرمىنالى

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)