شىنخۇا ئاگېنتلىقى، بىريۇسسېل، 7- ئاينىڭ 23- كۈنى تېلېگراممىسى (مۇخبىر دىڭ يىڭخۇا) ياۋروپا ئىتتىپاقى كىلىمات كۆزىتىش- ئۆلچەش ئاپپاراتى − كوپېرنىك كىلىمات ئۆزگىرىشى مۇلازىمەت ئىدارىسىنىڭ 7- ئاينىڭ 23- كۈنى ئېلان قىلىنغان دوكلاتىدا مۇنداق دېيىلدى: پۈتۈن يەر شارى 7- ئاينىڭ 21- كۈنى ھاۋارايى خاتىرىلەنگەندىن بۇيانقى ئەڭ ئىسسىق بىر كۈننى ئۆتكۈزدى، كۈندىلىك ئوتتۇرىچە ھاۋا تېمپېراتۇرىسى 17.09 سېلسىيە گىرادۇسقا يەتتى.
بۇ ھاۋا تېمپېراتۇرىسى 0.01 سېلسىيە گىرادۇسلۇق پەرق بىلەن 2023- يىلى 7- ئاينىڭ 6- كۈنى يارىتىلغان ئەڭ يۇقىرى رېكورتنى يېڭىلاپ، 1940- يىلىدىن بۇيانقى ئەڭ ئىسسىق بىر كۈن بولۇپ قالدى. دوكلاتتا كۆرسىتىلىشىچە، 0.01 سېلسىيە گىرادۇس قارىماققا ھېچقانچە پەرقلەنمىگەندەك كۆرۈنىدۇ، ھەقىقىي دىققەت قىلىشقا تېگىشلىكى 2023- يىلى 7- ئايدىن بۇيانقى ھاۋا تېمپېراتۇرىسى بىلەن ئىلگىرىكى يىللاردىكى ھاۋا تېمپېراتۇرىسىنىڭ «پەرقى»دىن ئىبارەت.
دوكلاتتىكى سانلىق مەلۇماتلاردا كۆرسىتىلىشىچە، 2023- يىلى 7- ئايدىن بۇرۇن، پۈتۈن يەر شارىنىڭ كۈندىلىك ئوتتۇرىچە ھاۋا تېمپېراتۇرىسى ئەڭ يۇقىرى رېكورتى 2016- يىلى 8- ئاينىڭ 13- كۈنى يارىتىلغان 16.8 سېلسىيە گىرادۇس ئىكەن؛ لېكىن 2023- يىلى 7- ئاينىڭ 3- كۈنىدىن بۇيان، 57 كۈننىڭ ھاۋا تېمپېراتۇرىسى ئۇ رېكورتتىن ئېشىپ كەتكەن بولۇپ، ئاساسلىقى 2023- يىلى 7- ئاي ۋە 8- ئايغا، 2024- يىلى 6- ئاي ۋە 7- ئايغا تارقالغان.
كوپېرنىك كىلىمات ئۆزگىرىشى مۇلازىمەت ئىدارىسىنىڭ مۇدىرى كارلو بۇئونتېمپو مۇنۇلارنى بىلدۈردى: پۈتۈن يەر شارىنىڭ يېقىنقى 13 ئاي ئىچىدىكى كۈندىلىك ئوتتۇرىچە ھاۋا تېمپېراتۇرىسىنىڭ ئەڭ يۇقىرى رېكورتى بىلەن ئىلگىرىكى ئەڭ يۇقىرى رېكورتىنىڭ پەرقى «كىشىنى چۆچۈتىدۇ»، «كىلىماتنىڭ سىجىل ئىللىپ كېتىشىگە ئەگىشىپ، بىز جەزمەن كەلگۈسى بىر نەچچە ئاي ياكى بىر نەچچە يىل ئىچىدە يېڭى رېكورتنىڭ بۇزۇپ تاشلانغانلىقىنى كۆرىمىز».
بۇ يىل 1- ئايدا، كوپېرنىك كىلىمات ئۆزگىرىشى مۇلازىمەت ئىدارىسى دوكلات بېرىپ: «2023- يىلى ھاۋارايى خاتىرىلەنگەندىن بۇيانقى ئەڭ ئىسسىق بىر يىل بولدى»، دېگەن. ئەڭ يېڭى دوكلاتتا مۇنداق قارالدى: گەرچە ھازىر مۆلچەرلەش بالدۇرلۇق قىلسىمۇ، لېكىن 2024- يىلى 2023- يىلىدىن ئېشىپ، ئەڭ ئىسسىق بىر يىل بولۇپ قېلىشى مۇمكىن.
پايدىلانغان مەنبە: شىنخۇا ئاگېنتلىقى
(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)