ئائىلىسىدىكىلەر سىن ئارقىلىق مەدەت بەردى

　7- ئاينىڭ 24- كۈنى، ئاقسۇ شەھىرىدە، مۇسابىقە قېيىقى ماھىرى ئادىلجان سۇلتاننىڭ ئائىلىسىدىكىلەر سىن ئارقىلىق پارىژ ئولىمپىك تەنھەرىكەت مۇسابىقىسىگە قاتنىشىدىغان ئادىلجانغا مەدەت ۋە ئىلھام بەردى. ئادىلجان سۇلتان پارىژ ئولىمپىك تەنھەرىكەت مۇسابىقىسى مۇسابىقە قېيىقى ئەرلەر ئىككى كىشىلىك جۈپ پالاقلىق تۈرى مۇسابىقىسىگە قاتنىشىدۇ.

　ئادىلجان سۇلتان ئاقسۇ شەھىرى ئىگەرچى بازىرى لۈشۇي كەنتىدە تۇغۇلغان، بۇ يىل 24 ياشتا، سۇ ئۈستى تەنھەرىكىتى بىلەن شۇغۇللىنىۋاتقىنىغا ئالتە يىل بولدى. بۇلتۇر خاڭجوۋ ئاسىيا تەنھەرىكەت مۇسابىقىسىنىڭ مۇسابىقە قېيىقى ئەرلەر تۆت كىشىلىك جۈپ پالاقلىق تۈرى ھەل قىلغۇچ مۇسابىقىسىدە، ئۇ باشقا ئۈچ سەپدىشى بىلەن بىرلىكتە چېمپىيون بولدى.

　2018- يىلى، شەنشى سۇ ئۈستى تەنھەرىكىتىنى باشقۇرۇش مەركىزى شىنجاڭغا ئىختىساسلىقلارنى تاللاشقا كەلدى، شىنجاڭلىق تۆت يىگىت شەنشىگە ئېلىپ بېرىلىپ، مۇسابىقە قېيىقى مەشىقى قىلدى، ئادىلجان دەل شۇلارنىڭ بىرى.

　جاپالىق مەشىق قىلىش ئارقىلىق، ئادىلجان بىر مۇنەۋۋەر مۇسابىقە قېيىقى تەنھەرىكەتچىسىدە بولۇشقا تېگىشلىك ساپاسىنى تەدرىجىي نامايان قىلدى. ئۇ ئىلگىرى- كېيىن بولۇپ 2019- يىللىق مەملىكەتلىك 2- نۆۋەتلىك ياشلار تەنھەرىكەت مۇسابىقىسى مۇسابىقە قېيىقى ئەرلەر تۆت كىشىلىك جۈپ پالاقلىق مۇسابىقىسىدە كۈمۈش مېدالغا، 2020- يىللىق مەملىكەتلىك مۇسابىقە قېيىقى لەۋھە تالىشىش مۇسابىقىسىدە مىس مېدالغا، 14- نۆۋەتلىك مەملىكەتلىك تەنھەرىكەت مۇسابىقىسى مۇسابىقە قېيىقى ئەرلەر تۆت كىشىلىك جۈپ پالاقلىق تۈرىدە 4- لىككە ئېرىشتى.

　2021- يىلى 10- ئايدا، ئادىلجان دۆلەتلىك مۇسابىقە قېيىقى كوماندىسىغا كىرىپ، پارىژ ئولىمپىك تەنھەرىكەت مۇسابىقىسى، خاڭجوۋ ئاسىيا تەنھەرىكەت مۇسابىقىسىگە تەييارلىق قىلدى. ئارقىدىن، يەنە 2022- يىللىق مۇسابىقە قېيىقى دۇنيا لوڭقىسى ئومۇمىي جەملىمە نومۇر مۇسابىقىسىدە چېمپىيون، 2022- يىللىق مەملىكەتلىك مۇسابىقە قېيىقى لەۋھە تالىشىش مۇسابىقىسىنىڭ ئەرلەر تۆت كىشىلىك جۈپ پالاقلىق تۈرىدە چېمپىيون، 2023- يىللىق مەملىكەتلىك مۇسابىقە قېيىقى ئەتىياز پەسىللىك چېمپىيونلۇق مۇسابىقىسىنىڭ ئەرلەر تۆت كىشىلىك جۈپ پالاقلىق تۈرىدە چېمپىيون بولدى.

　(ئاقسۇ ياخشى جاي، خۇاشاڭ گېزىتىدىن ئومۇملاشتۇرۇلدى)

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)