ئانار بۇلۇت \ شىنجاڭ گېزىتى خەۋىرى (مۇخبىر دۇڭ لياڭ) 7- ئاينىڭ 30- كۈنى، پارىژ ئولىمپىك تەنھەرىكەت مۇسابىقىسىنىڭ بوكس تۈرىدىكى ھەرقايسى دەرىجىلىكلەر بويىچە 16 كۈچلۈك ئىچىگە كىرىش مۇسابىقىسى شىمالىي پارىژ ماھارەت كۆرسىتىش مەيدانىدا ئۆتكۈزۈلدى. جۇڭگو بوكس كوماندىسىنىڭ ئەزاسى، شىنجاڭ ئالتايدىن كەلگەن ماھىر توختاربېك تاڭلاتقان ئەرلەرنىڭ 80 كىلوگىراملىقلار مۇسابىقىسىدە 5كە قارشى 0 نەتىجە بىلەن دومىنىكا ماھىرى كىرىستىيان خاۋېل پىنالەسكە يېڭىلىپ قېلىپ، 16 كۈچلۈك ماھىر قاتارىغا كىرەلمىدى.

　بۇ نۆۋەتلىك ئولىمپىك تەنھەرىكەت مۇسابىقىسىدە بوكس تۈرىنىڭ دەرىجىسى تەڭشەلدى، توختاربېك ئەسلىدە تۇرۇۋاتقان ئەرلەرنىڭ 75 كىلوگىراملىقلار دەرىجىسى بىلەن 81 كىلوگىراملىقلار دەرىجىسى، ئەرلەرنىڭ 80 كىلوگىراملىقلار دەرىجىسى قىلىپ بىرلەشتۈرۈلدى، بۇ، دۇنيا بويىچە مۇسابىقىگە قاتناشقان بوكسچىلار ئەڭ كۆپ، رىقابەت ئەڭ كەسكىن دەرىجە. بۇ دەرىجىدە بۇ قېتىم جەمئىي 18 ماھىر قاتناشتى، مۇسابىقىدە يەككە مۇسابىقىدە يېڭىلگەنلەرنى شاللاش تۈزۈمى قوللىنىلدى.

　ئولىمپىك تەنھەرىكەت مۇسابىقىسىگە ئىككىنچى قېتىم قاتناشقان توختاربېكنىڭ بەدەن ئېغىرلىقى دەرىجە ئۆرلىگەندىن كېيىن، 2023- يىلى ئىلگىرى- كېيىن بولۇپ دۇنيا بوكس لەۋھە تالىشىش مۇسابىقىسىدە ئىككىنچىلىككە ۋە خاڭجوۋ ئاسىيا تەنھەرىكەت مۇسابىقىسىدە چېمپىيونلۇققا ئېرىشتى. بۇ نۆۋەتلىك ئولىمپىك تەنھەرىكەت مۇسابىقىسىدە ئۇ 32 كۈچلۈك ئىچىگە كىرىشتە نۆۋىتى قۇرۇق بولغاچقا، بىۋاسىتە 16 كۈچلۈكنى تاللاش مۇسابىقىسىگە قاتناشتى. بۇ مەيدان مۇسابىقىدىكى رەقىبى 32 كۈچلۈك ئىچىگە كىرىش مۇسابىقىسىدە 0گە قارشى بەش نەتىجە بىلەن تايلاند ماھىرى ۋىلاپون چونچوخنى شاللىۋېتىپ، تېخىمۇ بالدۇر مۇسابىقىلىشىش ھالىتىگە كىرگەنىدى.

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)