«تېز قاراڭلار، چىلانتورۇقلار سودا سارايغا كىرىپ بازار ئايلاندى!» 8- ئاينىڭ 24- كۈنى سائەت 12:00لەردە ئۈرۈمچى شەھىرى ئاھالىسى ۋاڭ ئەيشيا دوستلار چەمبىرىكىگە شۇنداق چىقاردى ھەمدە چىلانتورۇقلارنىڭ سايباغ رايونى مېيمېي MM مال سېتىۋېلىش مەركىزىدە «ئايلانغان» سىن كۆرۈنۈشىنى تارقاتتى.

　شۇ كۈنى سايباغ رايونى «ئۈرۈمچىدە ئات ساياھىتى» ماركىسىغا بىرلەشتۈرۈپ، تۇنجى نۆۋەتلىك جۇڭگو شىنجاڭ خەلق ئىچى سەنئىتى پەسلى يۈرۈشلۈك پائالىيىتىنى قانات يايدۇردى، تۆت چىلانتورۇق ئايرىم- ئايرىم ھالدا مېيمېي MM مال سېتىۋېلىش مەركىزى ۋە خۇڭسەن MALLغا كىردى، ھەر مىللەت شەھەر ئاھالىلىرى ۋە ساياھەتچىلەر چىلانتورۇق بىلەن سۈرەتكە چۈشتى، نەق مەيداندا ئات ئويۇنى كۆرسىتىلدى.

　مېيمېي MM مال سېتىۋېلىش مەركىزىدىكى پىيادىلەر كارىدورىدا ئاتلار سەپ بولۇپ ماڭدى، ئىككى تەرەپتە 50 مودېل ئەتلەس چىپاۋ كىيىپ ئاتلار بىلەن بىللە ئىلگىرىلىدى، ئۆتكەن- كەچكەن شەھەر ئاھالىلىرى ۋە ساياھەتچىلەر سۈرەتكە چۈشۈپ خاتىرە قالدۇردى.

　خۇڭسەن MALLدا ئۆتكۈزۈلگەن بىر مەيدان «چىلانتورۇق + كارتون cosplay» ھەمتۈرتكە بولۇش كۆرگەزمىسى خېرىدارلارنى جەلپ قىلدى.

　بۇ يىل ئۈرۈمچىدە چىلانتورۇقلارنىڭ «كۆزنى قاماشتۇرۇپ» كوچا ئايلىنىشى قىزغىن داۋاملاشتى: چوڭ بازار پىيادىلەر كوچىسىدا چىلانتورۇقلار ساياھەتچىلەر بىلەن پات- پات ھەمتۈرتكە بولدى؛ ئۈرۈمچى مەدەنىيەت مەركىزىدە چىلانتورۇقلار مەردانە، مەزمۇت قەدەملەر بىلەن ماڭدى؛ خۇڭسەن مۇنارى ئاستىدا ھەيۋەتلىك چىلانتورۇق چاسا ئەترىتى نامايان بولدى...

　بۇ دەل ئۈرۈمچىنىڭ ئات مەدەنىيىتى ئامىلىنى بۆسۈش ئېغىزى قىلىپ يولغا قويغان «ئۈرۈمچىدە ئات ساياھىتى» ئۆزگىچە مەدەنىيەت- ساياھەت ماركىسى پائالىيىتىدۇر.

　سايباغ رايونلۇق مەدەنىيەت- تەنتەربىيە ۋە ساياھەت ئىدارىسى پارتىيە گۇرۇپپىسىنىڭ شۇجىسى شيې جىنيەن مۇنداق دېدى: «كېيىنكى قەدەمدە بىز يەنە سايباغ رايونىنىڭ مەدەنىيەت- ساياھەت بايلىقىغا تايىنىپ، كىشىلەرنى تېخىمۇ كۆپ مەنبەلىك مەدەنىيەت- ساياھەت تەسىراتى بىلەن داۋاملىق تەمىنلەپ، تېخىمۇ كۆپ ساياھەتچىنى ئۈرۈمچىگە كېلىپ ساياھەت قىلىشقا جەلپ قىلىپ، ئۇلارغا گۈزەل تەبىئىي مەنزىرە، چوڭقۇر مەدەنىيەت تارىخى، ئۆزگىچە ئادىمىيەت تەسىراتىنى ھېس قىلدۇرىمىز».

　(«ئۈرۈمچى كەچلىك گېزىتى» پۈتۈن تاراتقۇ مۇخبىرى گەي يۈ خەۋىرى)