داڭلىق يالقۇنتاغنى بويلاپ مېڭىپ شىنجاڭنىڭ پىچان ناھىيەسىگە كەلگىنىڭىزدە، تاغ گەۋدىسى بىر نەچچە جىلغا تەرىپىدىن ئايرىلغانلىقىنى، ئېقىن سۇنىڭ ئۇرۇلۇشى بىلەن يېرىقلار شەكىللىنىپ، چۆللۈكتىكى بوستانلىقنى بارلىققا كەلتۈرگەنلىكىنى كۆرىسىز.

　بۇنىڭ ئىچىدە تۇيۇق كەنتى ئالاھىدە كۆزگە چېلىقىدۇ، بۇ قەدىمىي يىپەك يولى ئۆتىڭى مىڭ يىلدىن ئارتۇق تارىخقا ئىگە بولۇپ، كۆپ خىل مەدەنىيەت گىرەلىشىپ كەتكەن جاي. دۆلىتىمىزدىكى تارىخىي مەدەنىيەتكە ئىگە داڭلىق كەنت بولۇش سۈپىتى بىلەن تۇنجى تۈركۈمدىكى مەملىكەت بويىچە ئەنئەنىۋى كەنت تىزىملىكىگە كىرگۈزۈلگەن.

　پۈتۈن كەنتتىكى 20دىن ئارتۇق جايغا مەدەنىيەت يادىكارلىقى ۋە قەدىمىي يادىكارلىقلار تارقالغان، تۇيۇق تاش غار توپى ۋە بۇددا ئىبادەتخانىسى خارابىسى 2010- يىللىق مەملىكەت بويىچە ئون چوڭ ئارخېئولوگىيەلىك يېڭى بايقاش بولۇپ باھالانغان.

　كەنت ئاھالىلىرىنىڭ تەبىئىي يەر شەكلى بويىچە سېرىق توپىدىن خاڭداپ سېلىنغان ئەنئەنىۋى ئاھالىلەر تۇرالغۇسى ياكى مۇستەقىل سېلىنغان ئۆيى ۋە ياكى تاغنى بويلاپ تۇتاش قۇرۇلۇش قىلىش ئۇسلۇبى ئۆزگىچە بولۇپ، ئادىمىيەت جەھەتتىكى ئۆرپ- ئادەت ۋە تەبىئىي مەنزىرە بىر گەۋدىلىشىپ، شىنجاڭ «خام توپا قۇرۇلۇش مۇزېيى» دەپ ئاتالدى.

　ۋاقىت ناھايىتى تېز ئۆتتى، تارىخ بۇ يەردە ئىز قالدۇردى، بۇ ئۇزاق تارىخقا ئىگە قەدىمىي كەنتنى قوغداش ئۈچۈن، شۇ جاي قوغداش ۋە تەرەققىيات پىلانى تۈزۈپ، «بىر ئۆيگە بىر لايىھە تۈزۈش»تەك قوغداش لايىھەسىنى قوللىنىپ، ئەنئەنىۋى ھۈنەر- سەنئەتنى داۋاملاشتۇرۇپ، قەدىمىي ئاھالىلەر تۇرالغۇلىرىنى قوغدىدى، رېمونت قىلدى، مۇستەھكەملىدى.

　ئولتۇراقلىشىش مۇھىتىنى تۈزەش، ئاممىۋى ئۇل ئەسلىھەلىرىنىڭ سۈپىتىنى ئۆستۈرۈش، ساياھەتچىلىكنى يۈرۈشلەشتۈرۈپ دەرىجىسىنى ئۆستۈرۈش قۇرۇلۇشىمۇ ماس قەدەمدە ئېلىپ بېرىلدى.

　يېقىنقى يىللاردىن بۇيان، تۇيۇق مەنزىرە رايونى دۆلەت 4A دەرىجىلىك ساياھەت مەنزىرە رايونى بولۇپ باھالاندى، ساياھەت مەنزىرە رايونىنىڭ دەرىجىسىنىڭ ئۆسۈشى، ئۇل ئەسلىھەلىرىنىڭ ئۈزلۈكسىز مۇكەممەللىشىشىگە ئەگىشىپ، داڭقىنى ئاڭلاپ كەلگەن ساياھەتچى كۆرۈنەرلىك كۆپەيدى، كەنتنىڭ ساياھەت كەسىپ ھالىتى تەدرىجىي بېيىدى.

　يېزا ئىگىلىك مەھسۇلاتلىرى، ساياھەت سۈرىتى، ئائىلىۋى مېھمانخانا، چۈشەندۈرگۈچىلەر... بارغانسېرى كۆپلىگەن كەنت ئاھالىلىرى «ساياھەت تامىقى» يەپ، يېزا- كەنتلەرنى گۈللەندۈرۈش تېز يولىغا ماڭدى.

　تۇيۇق كەنتى ئۇزاق ئۈنۈملۈك قوغداش ۋە پايدىلىنىش مېخانىزمى ئۈستىدە ئىزدىنىپ، قەدىمىي كەنتنى قوغداش ۋە يېزا- كەنت ساياھەتچىلىكىنى تەرەققىي قىلدۇرۇش خىزمىتىنى ياخشى ئىشلەپ، ھەم مەدەنىيەت مىراسلىرىنى ئۈنۈملۈك قوغداپ، ھەم ساياھەت ئىقتىسادى ئۈنۈمىگە ئېرىشىپ، يىپەك يولى قەدىمىي ئۆتىڭىنى داۋاملىق جۇلالاندۇرىدۇ.

　مۇخبىر: چېن سۇ، خۇ خۇخۇ

　پايدىلانغان مەنبە: شىنخۇا ئاگېنتلىقى ئابۇنىچىلار تېرمىنالى

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)