ئانار بۇلۇت \ شىنجاڭ گېزىتى خەۋىرى (مۇخبىر جاۋ شىيا، ئىختىيارىي مۇخبىر دېڭ شياۋشۇاڭ) 10- ئاينىڭ 10- كۈنى، بىر ھەپتە داۋاملىشىدىغان 2024- يىللىق ئاپتونوم رايونلۇق داشۆ ئوقۇغۇچىلىرىنىڭ مەكتەپ پۇتبول بىرلەشمە مۇسابىقىسى قەشقەر داشۆدە باشلاندى.

　بۇ نۆۋەتلىك بىرلەشمە مۇسابىقىدە ئوغۇللار «A» گۇرۇپپىسى، ئوغۇللار «B» گۇرۇپپىسى، قىزلار گۇرۇپپىسىدىن ئىبارەت ئۈچ گۇرۇپپا تەسىس قىلىندى، شىنجاڭ ئىچىدىكى 24 ئالىي مەكتەپتىن 31 كوماندا، 706 تەنھەرىكەتچى قاتناشتى.

　ئىگىلىنىشىچە، ئاپتونوم رايونىمىز 2022- يىللىق ئاپتونوم رايونلۇق ياش- ئۆسمۈرلەر مەكتەپ پۇتبول بىرلەشمە مۇسابىقىسى (داشۆ گۇرۇپپىسى)دە تۇنجى قېتىم قىزلار گۇرۇپپىسى مۇسابىقىسىنى تەسىس قىلغان بولۇپ، بۇ، پۇتبول ھەرىكىتىنى قىزغىن سۆيىدىغان، پۇتبول ئارزۇسىنى قوغلىشىدىغان تېخىمۇ كۆپ قىزلارغا ماھارىتى ۋە سالاپىتىنى نامايان قىلىدىغان سەھنە ھازىرلاپ بەرگەن. قەشقەر داشۆنىڭ 3- يىللىق ئوقۇغۇچىسى قەدىرىيە مىجىت ئۇدا ئۈچ يىل ئاپتونوم رايونلۇق داشۆ ئوقۇغۇچىلىرىنىڭ مەكتەپ پۇتبول بىرلەشمە مۇسابىقىسىگە قاتناشتى. بۇ قېتىمقى مۇسابىقىدە ئۇ ئىشەنچكە تولدى، «پۇتبول ئويناش ماڭا كوللېكتىپ ھەمكارلىق ۋە قەتئىي داۋاملاشتۇرۇشنى ئۆگىتىپلا قالماي، يەنە ماڭا ئىشەنچ ۋە خۇشاللىق بېغىشلىدى! بۇ قېتىمقى مۇسابىقىدە كوماندا ئەزالىرى بىلەن بىللە ھەقىقىي سەۋىيەدە مۇسابىقىلىشىپ، مەكتەپ ئۈچۈن تېخىمۇ كۆپ شان- شەرەپ كەلتۈرۈشنى ئۈمىد قىلىمەن!» دېدى قەدىرىيە. 

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)