ئالتۇن كۈزدىكى 10- ئايدا، ساۋەن شەھىرى يەنسىخەي بازىرى بىر يىل ئىچىدىكى ئەڭ ئاۋات پەيتنى كۈتۈۋالدى. بۇ يىل، يەنسىخەي بازىرىدا 22 مىڭ 800 مو يەرگە لازا تېرىلغان بولۇپ، يىپ لازا، تاختا لازا، قاپاق لازا ۋە دېڭلۇڭجياۋ لازىدىن ئىبارەت تۆت چوڭ تۈردىكى 20 نەچچە خىل سورت بار. شىنجاڭدىكى ئەڭ كۆلەملەشكەن يېمەكلىك لازا يىغىش- تارقىتىش ئورنى بولۇش سۈپىتى بىلەن، يىلىغا 10 مىڭ توننىدىن ئارتۇق قۇرۇتۇلغان لازا ئىشلەپچىقىرىدۇ، بۇنىڭ %80تىن كۆپرەكى شەنشى، خۇنەن قاتارلىق دۆلەت ئىچىدىكى لازا پىششىقلاش، يىغىش- تارقىتىش چوڭ ئۆلكىلىرىگە سېتىلىدۇ، يەنە كورېيە، ياپونىيە، ئاۋسترالىيە قاتارلىق چەت ئەل بازارلىرىدىمۇ سېتىلىدۇ. 10- ئاينىڭ 8- كۈنى، ساۋەن شەھىرىنىڭ يەنسىخەي بازىرىدا، 10 مىڭ مو لازا ئېتىزىدا لازا يىغىش ماشىنىسى گۈرۈلدەپ، توشۇش ئاپتوموبىللىرى موكىدەك ئۆتۈشۈپ تۇراتتى؛ قۇرۇتۇش مەيدانىدا لازا تېرىيدىغان دېھقانلارنىڭ ئالدىراش سىيماسى كۈزلۈك يىغىمنىڭ جانلىق كارتىنىسىنى ھاسىل قىلغانىدى.

　قاراڭ، مول ھوسۇل ئېلىنغان لازا ئېتىزىدا، لازا يىغىش ماشىنىلىرى ئالدىراش ئىشلىمەكتە. توشۇش ئاپتوموبىللىرى خۇددى ئۈزۈپ يۈرگەن غايەت زور ئەجدىھاغا ئوخشاش ئېتىز- ئېرىقلاردا ئۇياقتىن- بۇياققا ئۆتۈشۈپ، مول- ھوسۇل مېۋىلىرىنى قۇرۇتۇش مەيدانىغا توشۇۋاتاتتى.

　قۇرۇتۇش مەيدانىغا كەلسىڭىز، كۆز ئالدىڭىزدا قىپقىزىل مەنزىرە پەيدا بولىدۇ. ئەمدىلا ئېتىزدىن يۆتكەپ كېلىنگەن قىزىل لازىلار تەكشى يېيىتىلغان بولۇپ، خۇددى يالقۇنجاپ يېنىۋاتقانئوت يالقۇنىغا ئوخشايدۇ. قۇياش نۇرى ئاستىدا، لازىلار ئوتقاشتەك يالتىراپ كىشىنى ئۆزىگە مەپتۇنقىلىپ، ئاجايىپ جەلپ قىلارلىق خۇش پۇراق تارقىتىدۇ. قۇرۇتۇش مەيدانىدا، لازىلارنىڭ ئسسىقلىقنى تەكشى قوبۇل قىلىپ، تېز قۇرۇشىغا كاپالەتلىك قىلىش ئۈچۈن،ئىشچىلار لازىلارنى ئاپتاپقا سېلىش بىلەن ئالدىراش بولۇپ كەتكەنىدى.

　قۇرۇتۇش مەيدانىنىڭ يەنە بىر تەرىپىدە، بىر توپ لازا تېرىيدىغان دېھقانلار بىر رەت بولۇپ تىزىلىپ، بېشىنى تۆۋەن سېلىپ لازا تېرىۋاتاتتى. ئۇلار مەشغۇلاتقا پىشقان، سۈرئىتىمۇ تېز ئىدى. لازا تېرىيدىغان دېھقانلار بىر تەرەپتىن لازا تېرىغاچ، بىر تەرەپتىن مۇڭدىشىۋاتاتتى، ئۇلارنىڭ چېھرىدە قانائەت ۋە بەخت كۈلكىسى جىلۋىلەنگەنىدى. بۇ ئىنچىكە خىزمەت ئارقىلىق لازا سۈپىتىنى قاتتىق كونترول قىلغىلى بولۇپلا قالماي، مول ھوسۇل نەتىجىلىرى تېخىمۇ ياخشى قەدىرلىنىدۇ ۋە ئاسرىلىدۇ.

　جىلغا يېنىدىكى چۆللۈكتە قۇرۇتۇلۇۋاتقان قىزىل لازىلاركىشىنىڭ ئەڭ دىققىتىنى تارتاتتى. يېرىمى چوڭقۇر جىلغا، يېرىمى قىپقىزىل لازا قۇرۇتۇش مەيدانى بولۇپ، ئىككىسى روشەن سېلىشتۇرما ھاسىل قىلغانىدى. كۆك ئاسمان، ئاق بۇلۇتلارنىڭ ھۆسىن قوشۇشى بىلەن، بۇ ئاپتاپقا سېلىش مەيدانى تېخىمۇ ئۆزگىچە ھەم ھەيۋەتلىك كۆرۈنەتتى. لازا بىلەن جىلغا، چۆللۈك بىر- بىرىنى جۇلالاندۇرۇپ، ئۆزگىچە كۈز مەنزىرىسىنى ھاسىل قىلغانىدى.

　(ساۋەن شەھەرلىك يۇغۇرما تاراتقۇ مەركىزى مۇخبىرى ۋاڭ يىڭ، تەكلىپلىك فوتوگراف لى شۈ)

　مەنبە: ساۋەن شەھەرلىك يۇغۇرما تاراتقۇ مەركىزى