ئانار بۇلۇت \ شىنجاڭ گېزىتى خەۋىرى (مۇخبىر دۇڭ شياۋخەن) «بالام داۋاملىق تىرىشقىن، غەيرەت قىل! مەملىكەتنىڭ ھەرقايسى جايلىرىدىكى تورداشلارنىڭ بالامنى قۇتقۇزۇشقا ياردەم بەرگىنىگە رەھمەت». 10- ئاينىڭ 23- كۈنى، شاۋزاتنىڭ دادىسى مەي ئەپەندى (ئۆزگەرتىلگەن ئىسىم) قۇتقۇزۇش ئاپتوموبىلىدا بالىغا ھەمراھ بولۇپ، بالىنىڭ ئەھۋالىغا ھەر ۋاقىت دىققەت قىلىپ تۇرۇۋاتاتتى. مىليونلىغان تورداشنىڭ ئۇلارغا دىققەت قىلىۋاتقانلىقىنى ھەمدە بەس- بەستە مېھىر- شەپقەت يەتكۈزۈۋاتقانلىقىنى بىلگەندىن كېيىن، ئۇ تېلېفوندا ھاياجانلانغان ھالدا رەھمىتىنى بىلدۈردى.

　بۇ يىل 7- ئاينىڭ 8- كۈنى شاۋزات تېخى ۋاقتى توشمايلا، خوتەن ۋىلايىتى گۇما ناھىيەسىدە تۇغۇلۇپ قالدى. تۇغۇلغىنىغا 100 نەچچە كۈن بولغان ئۇنىڭ تۇغما يۈرەك كېسىلى (قېرىنچە پاسىلى كەمتۈك بولۇش، ئارتېرىيە نەيچىسى ئېتىلمەسلىك)، يۈرەك ئىقتىدارى تولۇق بولماسلىق، ھەم ئۇنىڭغا قوشۇلۇپ يۇقىرى قىزىتما قاتارلىق كېسەللىك ئالامەتلىرى بار بولۇپ، ھاياتىغا خەۋپ يېتىشى مۇمكىن ئىدى.

　شاۋزاتنىڭ دادىسى مەي ئەپەندى بۇ يىل 34 ياش، ئاپىسى مىنا (ئۆزگەرتىلگەن ئىسىم) 37 ياش بولۇپ، ئىككىلىسى مېيىپ. مەي ئەپەندىنىڭ ئىككى يېشىدىن باشلاپ ئىككى كۆزى كۆرمەس بولۇپ قالغان، ئۇ تۇرمۇشىنى قامداش ئۈچۈن، ئەمالار ئۇۋۇلاش تېخنىكىسىنى قېتىرقىنىپ ئۆگىنىپ، بىر ئۇۋۇلاش دۇكىنىدا ئىشلىگەن. مىنانىڭ پۇتى مېيىپ، ھەرىكىتى قولايسىز بولۇپ، ئائىلىسىنىڭ ھالىدىن خەۋەر ئېلىشقا مەسئۇل ئىدى. شۇنداق قىلىپ، مىنا مەي ئەپەندىنىڭ كۆزىگە ئايلىنىپ، ئۇنىڭغا يۆنىلىشنى كۆرسىتىپ بېرەتتى، مەي ئەپەندى بولسا مىنانىڭ ئالغا ئىلگىرىلىشىدىكى كۈچ ئىدى.

　2018- يىلى ئۇلارنىڭ تۇنجى بالىسى تۇغۇلدى، ئەپسۇس بالىسى تۆت ئايلىق بولغاندا تۇيۇقسىز قىزىپ قېلىپ، بەختكە قارشى ئۆلۈپ كەتتى. كەينىدىن شاۋزات تۇغۇلغاندىن كېيىن، بىر ئائىلە كىشىلىرى شاۋزات تۇغۇلغانلىق خۇشاللىقىغا چۆمدى، كىم بىلسۇن، تەقدىر ئۇلارغا يەنە بىر قېتىم چاقچاق قىلدى.

　نەپەس ئېلىشى ناھايىتى قىيىن بولغان بالىنى كۆرۈپ تۇرۇۋېتىپمۇ، مەيلى قانچىلىك قىيىن بولسۇن، ئۇلار ئەزەلدىن ۋاز كېچىشنى ئويلاپ باقمىغان ئىدى، ئۇرۇق- تۇغقانلىرىمۇ كۆپ تەرەپتىن سۈرۈشتۈرۈپ، سىچۇەن داشۆ خۇاشى 2- دوختۇرخانىسىغا بېرىپ داۋالىتىشنى قارار قىلدى.

　بۇ قېتىم جىنشىپىن چاڭتيەن خەۋىرىدىن بىللە ماڭغان مۇخبىر ۋۇ جۇڭمىن ئانار بۇلۇت \ شىنجاڭ گېزىتى مۇخبىرىغا مۇنداق دېدى، شاۋزات 23- چېسلا ئەتىگەندىن باشلاپ ئىزچىل قىزىغاچقا، قىزىتما قايتۇرۇش چاپلىقى چاپلىنىپ، نەپەسلەندۈرۈش ئاپپاراتى ئورنىتىلدى، بىللە ماڭغان تېببىي خادىملار ھەر ۋاقىت ئۇنىڭ بەدەن تېمپېراتۇرىسىنى ئۆلچەپ تۇرۇۋاتىدۇ. ئۇ ئىككى سائەتتە بىر قېتىم سۈت ئىچىدۇ، بىر قېتىمدا 30 مىللىلېتىر سۈت ئىچىدۇ، بەدەن ئېغىرلىقى تۇغۇلغاندىن تارتىپ ھازىرغىچە ئۈچ كىلوگىرامغا تۇرۇۋاتىدۇ. ھازىر ئۇنىڭدىكى ھاياتلىق ئالامەتلىرى مۇقىم، لېكىن ھەر ۋاقىت ئۇنىڭدا يۆتىلىش، يۇقۇملىنىش قاتارلىق خەتەرلەرنىڭ كۆرۈلمەسلىكىگە كاپالەتلىك قىلىش كېرەك.

　شاۋزاتنىڭ كېسىلىگە ھەممەيلەن كۆڭۈل بۆلدى، كۆپچىلىك بەس- بەستە ئۆزىنىڭ مېھىر- مۇھەببىتىنى تەقدىم قىلدى، ماقالە ئېلان قىلىنغانغا قەدەر(10- ئاينىڭ 23- كۈنى سائەت 17:54كىچە) ئىئانە قىلىنغان پۇل 240 مىڭ يۈەنگە يەتتى.

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)