ئانار بۇلۇت \ شىنجاڭ گېزىتى مۇخبىرى بەي سۇجۈن

10- ئاينىڭ 13- كۈنى سائەت 23، بورتالا شەھىرى ئوتبۇلاق بازىرى بايار بۇلاق كەنتىنىڭ كەنت دوختۇرى ئەن يۇڭشيا دەم ئالاي دەپ تۇرغاندا، كەنت ئاھالىسى زىمەرگۈل مەمەتخاننىڭ تېلېفونىنى تاپشۇرۇۋالدى، زىمەرگۈل قىزىنىڭ تۇيۇقسىز ئىچى سۈرۈپ كەتكەنلىكىنى، قانداق قىلىش كېرەكلىكىنى سورىدى.

ئەن يۇڭشيا زىمەرگۈل بىلەن سىنلىق سۆزلىشىپ، قىزىنىڭ كېسەللىك ئالامەتلىرىنى تەپسىلىي ئىگىلىگەندىن كېيىن، دورا ئىشلىتىشنى ھەم يېقىنقى مەزگىلدە دىققەت قىلىشقا تېگىشلىك ئىشلارنى تەپسىلىي تاپىلىدى. كەچتە كەنت ئاھالىلىرىنىڭ ياردەم تەلەپ قىلىپ ئۇرغان تېلېفونىنى تاپشۇرۇۋېلىشتەك بۇنداق ئەھۋالغا ئەن يۇڭشيا ئاللىبۇرۇن كۆنۈپ كەتكەنىدى.

بۇ يىل 50 ياشقا كىرگەن ئەن يۇڭشيا 21 يېشىدىلا بايار بۇلاق كەنتىگە كېلىپ، كەنت دوختۇرى بولغان. 20 نەچچە يىلدىن بۇيان، ئەن يۇڭشيا جان كۆيدۈرۈپ ئىشلەپ، ئىش ئورنىدا چىڭ تۇرۇپ، كەنت ئاھالىلىرىنىڭ ساغلاملىقىنى قوغداپ كەلدى. ھەر كۈنى دېگۈدەك ئۇچرىشىپ بىللە ئۆتۈش جەريانىدا، كەنت ئاھالىلىرىمۇ ئاللىقاچان ئۇنى قان قېرىنداش تۇغقىنىدەك كۆرىدىغان بولدى، يەنە ئۇنىڭغا «ئايشەمگۈل» دەپ ئۇيغۇرچە ئىسىم قويۇپ قويدى، بۇ، پاك «ئاي گۈلى» دېگەن مەنىدە ئىدى.

ئەن يۇڭشيانىڭ بىر ئادىتى بولۇپ، مەيلى خىزمەت قىلىۋاتقاندا بولسۇن ياكى ئارام ئېلىۋاتقاندا بولسۇن، يان تېلېفونىنى ئەزەلدىن ئېتىپ قويمايتتى، چۈنكى كەنت ئاھالىلىرى تۇيۇقسىز ئاغرىپ قالغاندا، بىرىنچى ۋاقىتتا ئۇنىڭدىن ياردەم سورايتتى. ئادەتتە كىم ئۆيىدە ياخشى تاماق ئەتسە، ئۇنىڭغا بىر قاچا سۇنۇشنى ئۇنتۇپ قالمايتتى. «كەنت ئاھالىلىرى ماڭا بەك ئىشىنىدۇ، بۇ دوستلۇق مېھرىنى تىل بىلەن تەسۋىرلەشكە ئاجىزلىق قىلىمەن» دېدى ئەن يۇڭشيا.

بايار بۇلاق كەنتىنىڭ %98 كەنت ئاھالىسى ئۇيغۇر مىللىتى ئىدى، كېسەل كۆرسەتكەندە ئۆزئارا راۋان پىكىر ئالماشتۇرۇشقا قولايلىق بولۇشى ئۈچۈن، ئەن يۇڭشيا ئۆزلۈكىدىن ئۇيغۇر تىلىنى ئۆگەندى.

ئالدىنقى ئەسىرنىڭ 90- يىللىرىدا، بايار بۇلاق كەنتىنىڭ ئىقتىسادىي شارائىتى ياخشى بولمىغاچقا، ئەن يۇڭشيا قىيىنچىلىقى بار كەنت ئاھالىلىرىگە نېسىگە دورا بېرەتتى. ئۇنىڭ ئىشكاپىدا نۇرغۇن ھېسابات دەپتىرى بار بولۇپ، خىزمەت قىلغاندىن باشلاپ ئۇ ئائىلىسىدە قىيىنچىلىقى بار كەنت ئاھالىلىرىنىڭ كېسىلىنى داۋالىغاندا كەنت ئاھالىلىرى نېسى قىلغان خىراجەت خاتىرىلەنگەن، ئەڭ كۆپ نېسى قالغان سومما 3000 يۈەندىن ئاشىدۇ، ھالبۇكى پۇلى نېسى قالغان بەزى كەنت ئاھالىلىرى ئۆلۈپ كەتكەنىدى.

«ئاۋۋال كېسىلىڭىزنى كۆرۈپ باقاي، پۇلنىڭ ئىشىنى كېيىن دېيىشەيلى.» بۇ ئەن يۇڭشيانىڭ ئاغرىقلارغا دائىم دەيدىغان سۆزى. مەيلى كۈندۈز ياكى كېچە بولسۇن، كىملا كېسەل كۆرسەتكىلى كەلسە، ئۇ ھەممىنى رازى قىلىپ، ئەڭ زور تىرىشچانلىق كۆرسىتىپ ئاغرىقلارنى ئاغرىق ئازابىدىن قۇتۇلدۇردى.

2005- يىلى باھار بايرىمىنىڭ 2- كۈنى، ئىشىكنىڭ جىددىي چېكىلگەن ئاۋازى كېچىنىڭ جىمجىتلىقىنى بۇزدى. ئەن يۇڭشيا ئۇيقۇدىن چۆچۈپ ئويغىنىپ، ئالدىراپ ئورنىدىن تۇرۇپ ئىشىكنى ئاچتى. ئەسلىدە كەنتتىكى بىر ھامىلىدار ئايالنىڭ قورسىقى ئاغرىپ، ئائىلىسىدىكىلەر ياردەم سوراپ كەلگەنىدى. ئەن يۇڭشيا ئىككىلەنمەيلا دورا ساندۇقىنى ئېلىپ ھامىلىدار ئايالنىڭ ئۆيىگە باردى. ئۇ ئەستايىدىللىق بىلەن ئاغرىقنىڭ سالامەتلىكىنى تەكشۈرۈپ كېسەللىك ئەھۋالىغا دىياگنوز قويدى، قارشى تەرەپنىڭ كېسەللىك ئەھۋالى ياخشىلانغاندىن كېيىن، ئۇ ئاندىن ھارغىن تېنىنى سۆرەپ ئۆيىگە قايتتى.

كەنت ئاھالىسى نۇرىمانگۈل روزاخۇن مۇنداق دېدى: ئەن يۇڭشيا ئاغرىقلارغا ناھايىتى سەۋرچان، ئاغرىقلارنىڭ ئائىلىسىدە قىيىنچىلىقى بولسا، ئۇ قارشى تەرەپنىڭ پۇلنى نېسى قىلىپ پۇل تاپقاندا قايتۇرۇشىغا ئۇنايدۇ.

«ئون يىل ئىلگىرى، مەن ئېغىر كېسەلگە گىرىپتار بولۇپ قالغانىدىم، ئەن دوختۇر ئائىلىسىنىڭ پۇلىدىن 10 مىڭ يۈەن چىقىرىپ، مېنىڭ چوڭ دوختۇرخانىغا بېرىپ ئوپېراتسىيە قىلدۇرۇشۇمغا ھەمراھ بولدى، قايتىپ كەلگەندىن كېيىن، مېنى تاكى سالامەتلىكىم ئەسلىگە كەلگەنگە قەدەر كەنت داۋالاش ئۆيىدە داۋاملىق داۋالىدى.» كەنت ئاھالىسى تۇرسۇن ھەسەن مۇنداق دېدى: بۇ مېھىر- شەپقەتنى مەڭگۈ ئېسىمدە ساقلايمەن.

ئەن يۇڭشيانىڭ ئېرى شۆ لىمىن مۇنداق دېدى: خوتۇنۇم دائىم ئىسمېنا قوشۇپ ئىشلەپ، ئۆي ئىشلىرىغا يېتىشەلمەيدۇ، «مەن ئۇنىڭغا كۆپ قېتىم ئىستېپا بېرىپ دورىخانا ئاچسا بۇنچە جاپا تارتمايدىغانلىقى ھەم پۇلنىمۇ كۆپ تاپالايدىغانلىقى توغرىسىدا نەسىھەت قىلغان بولساممۇ، ئۇ قەتئىي قوشۇلمىدى».

2021- يىلى 9- ئايدا، ئەن يۇڭشيا يامان سۈپەتلىك ئۆسمىگە گىرىپتار بولۇپ قالدى. داۋالانغان مەزگىلدە، نۇرغۇن كەنت ئاھالىسى ئۆزلۈكىدىن ئۈرۈمچىگە بېرىپ ئۇنى يوقلىدى، يەنە بەزى كەنت ئاھالىلىرى باشقىلارغا ھاۋالە قىلىپ پىشۇرۇق ئەۋەتتى.

يەتتە قېتىملىق خىمىيەلىك داۋالاش ئارقىلىق، ئەن يۇڭشيا كېسەللىك ئۈستىدىن غالىب كېلىپ، 2- يىلى يەنە خىزمەت ئورنىغا قايتىپ كەلدى.

كەنت ئاھالىلىرىنى تېخىمۇ ياخشى داۋالاش مۇلازىمىتى بىلەن تەمىنلەش ئۈچۈن، ئەن يۇڭشيا ھەر يىلى تەربىيەلەشكە ئاكتىپ قاتنىشىپ، ئەڭ يېڭى بىلىملەرنى ئۆگەندى. ئۇنىڭ تىرىشچانلىقىدا، كەنت داۋالاش ئۆيى ئۈزلۈكسىز كېڭەيدى، ئۇ يېتەكلىگەن ئوقۇغۇچىلارنىڭ داۋالاش تېخنىكىسىمۇ ئۈزلۈكسىز ئۆستى.

«خىزمەتتە، مۇئەللىم بىزگە ناھايىتى قاتتىق تەلەپ قويىدۇ، دائىم بىزگە ئۆمۈرلۈك ئۆگىنىش ئىقتىدارىنى ساقلاش توغرىسىدا تەلىم بېرىدۇ. تۇرمۇشتا، ئۇ ھەمىشە باشقىلارنىڭ غېمىنى يەيدۇ، ياشلارغا ئىنتايىن كۆڭۈل بۆلىدۇ.» ئەن يۇڭشيانىڭ ئوقۇغۇچىسى ئەقىدە غەيرەت مۇنداق دېدى: مۇئەللىمگە ئەگىشىپ غەرب تېبابىتى بىلىملىرىنى ئۆگىنىپلا قالماي، يەنە ئەمەن بىلەن داغلاش، لوڭقا قويۇش ۋە ئۇۋۇلاش قاتارلىق تېخنىكىلارنى ئىگىلىدىم.

ئەن يۇڭشيا مۇنداق دېدى: ھېسابات دەپتىرىدىكى نېسى قالغان پۇللارنى مەن چىقىرىپ تۇردۇم، كەنت ئاھالىلىرىنىڭ ئىقتىدارى بولسىلا قايتۇرىدۇ، پەقەت قايتۇرالمىسىمۇ ھېچقىسى يوق، «ئۇلارغا ياردەم بېرىپ ئاغرىق ئازابىنى يېنىكلىتىش مېنىڭ ئەڭ چوڭ ئارزۇيۇم».

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)