«قوش 11»غا كونىسىنى يېڭىسىغا ئالماشتۇرۇش سىياسىتى قوشۇلسا باھا يەنىمۇ تۆۋەنلەمدۇ؟ 10- ئاينىڭ 25- كۈنى، ئۈرۈمچى شەھىرى تىيانشان رايونلۇق سودا ئىدارىسى ئۆتكۈزگەن «<قوش 11>نى كۈتۈۋېلىش . دۆلەت تولۇقلىمىسى كەلدى، كونىسىنى يېڭىسىغا ئالماشتۇرايلى» پائالىيىتىدە تىجارەتچىلەر ۋە ئىستېمالچىلار بەس- بەستە چوت سوقۇشتى.

　شۇ كۈنى سائەت 11:00دە خەلق مەيدانىنىڭ شەرق تەرىپىدە تىيانشان رايونلۇق سودا ئىدارىسى ئوندىن ئارتۇق ئاپتوموبىل، ئائىلە ئېلېكتىر سايمانلىرى ۋە ئېلېكتىرون مەھسۇلاتلىرى كارخانىسىنى سېتىشنى ئىلگىرى سۈرۈش پائالىيىتىگە قاتنىشىشقا تەكلىپ قىلدى. پائالىيەت نەق مەيدانىدا ئاپتوموبىل كۆرگەزمە رايونى ۋە ئېلېكتىر سايمانلىرى كۆرگەزمە رايونى تەسىس قىلىندى.

　شىنجاڭ سۇنىڭ يىگوۋ سودا چەكلىك شىركىتى خۇالىڭ دۇكىنىنىڭ باشلىقى ۋاڭ لىپىڭ مۇنداق دېدى: «سۇنىڭ يىگوۋ دۇكىنىمىزدا دۆلەتنىڭ ياردەم تولۇقلىمىسىدىن باشقا، يەنە ئۆزىمىزنىڭ مەخسۇس ياردەم تولۇقلىمىسى فوندى بار».

　ۋاڭ لىپىڭ تونۇشتۇرۇپ مۇنداق دېدى: دۆلەتنىڭ ياردەم تولۇقلىمىسى سىياسىتىدە ئېنېرگىيە تېجەش ئۈنۈمى 1- دەرىجىلىك بولغان (ئائىلە ئېلېكتىر سايمانلىرى) ياردەم تولۇقلىمىسى %20، ئېنېرگىيە تېجەش ئۈنۈمى 2- دەرىجىلىك بولغان (ئائىلە ئېلېكتىر سايمانلىرى) ياردەم تولۇقلىمىسى %15 بولۇپ، بارلىق پائالىيەت سالمىقى ۋە سۇنىڭنىڭ مەخسۇس ياردەم تولۇقلىمىسى فوندىنى قوشقاندا، ئەڭ يۇقىرى بولغاندا %45كە يېتىدۇ.

　ۋاڭ لىپىڭغا ئوخشاش كۆرگەزمىگە قاتناشقان ھەرقايسى كارخانىلار ئەڭ يېڭى ئاپتوموبىل تىپلىرى ۋە ئائىلە ئېلېكتىر سايمانلىرى مەھسۇلاتلىرىنى بەس- بەستە كۆرگەزمە قىلدى ھەمدە بەلگىلەنگەن سوممىغا يەتسە پۇلنى كېمەيتىش، زاۋۇت ياردەم تولۇقلىمىسى، كونىسىنى يېڭىسىغا ئالماشتۇرۇش قاتارلىق سالمىقى بىر قەدەر زور بولغان ئېتىبار بېرىش سىياسەتلىرى ۋە سېتىشنى ئىلگىرى سۈرۈش پائالىيەتلىرىنى يولغا قويۇپ، ئىستېمالچىلارنى نەپكە ئېرىشتۈردى.

　ئاپتوموبىلىنى ئالماشتۇرماقچى بولغان ئۈرۈمچى شەھەر ئاھالىسى ما شۆ مۇنداق دېدى: «بىز ئىزچىل <قوش 11> پائالىيىتىنى ساقلاۋاتقانىدۇق، بايا دۆلەتنىڭ ياردەم تولۇقلىمىسى بىلەن زاۋۇتنىڭ ياردەم تولۇقلىمىسى قوشۇلۇپ 28 مىڭ يۈەن ئېتىبار بېرىلىدىغانلىقىنى بىلدۇق، بۇ بىز ئىلگىرى كۆرگەن باھادىنمۇ مۇۋاپىق بولىدىكەن».

　تىيانشان رايونلۇق سودا ئىدارىسىنىڭ مۇئاۋىن باشلىقى لياڭ جۈن مۇنداق دېدى: تىيانشان رايونىدىكى ھەرقايسى ئالاقىدار كارخانىلار ئالدىنقى مەزگىلدە تۈرلۈك كونىسىنى يېڭىسىغا ئالماشتۇرۇش، سېتىشنى ئىلگىرى سۈرۈش ياردەم تولۇقلىمىسى پائالىيىتىنى قانات يايدۇرۇش ئاساسىدا سىجىل كۈچەپ، كونىسىنى يېڭىسىغا ئالماشتۇرۇش، سېتىشنى ئىلگىرى سۈرۈش سىياسىتى ۋە كارخانىلارنىڭ پايدىنى ئۆتۈنۈپ بېرىش، قوش ياردەم تولۇقلىمىسىنىڭ ئالغا سىلجىتىشى بىلەن ئىستېمال بازىرىنىڭ ھاياتىي كۈچىنى ئۇرغۇتۇپ، نۇقتىلىق ئىستېمال بۇيۇملىرىنىڭ سېتىلىش مىقدارىنى ئاشۇرۇشتا پائال ئالغا سىلجىتىش رولىنى ئوينىدى.

　(«ئۈرۈمچى كەچلىك گېزىتى» پۈتۈن تاراتقۇ مۇخبىرى ۋاڭ لىنا خەۋىرى)