شىنخۇا ئاگېنتلىقى، ئۈرۈمچى، 10- ئاينىڭ 27- كۈنى تېلېگراممىسى (مۇخبىرلار پەن يىڭ، جاڭ يۈ) مۇخبىرلارنىڭ 10- ئاينىڭ 27- كۈنى شىنجاڭ ئۇيغۇر ئاپتونوم رايونلۇق ئەدەبىيات- سەنئەتچىلەر بىرلەشمىسىدىن ئىگىلىشىچە، شىنجاڭ مەملىكەت ئىچى ۋە سىرتىدىكى يازغۇچىلار ۋە ئەدەبىيات ھەۋەسكارلىرىدىن شىنجاڭ تېمىسىدىكى نادىر ئەدەبىي ئەسەرلەرنى كەڭ كۆلەمدە توپلىغان بولۇپ، ھازىرغىچە پۈتۈن مەملىكەتنىڭ ھەر قايسى جايلىرىدىن يوللانغان 120دىن ئارتۇق ئەسەرنى تاپشۇرۇۋالغان.

　تىيانشان ئەدەبىيات مۇكاپاتىنى باھالاش ئىشخانىسىنىڭ ئالاقىدار مەسئۇلى مۇنداق دېدى: ئاپتونوم رايونلۇق پارتىيە كومىتېتىنىڭ ئورۇنلاشتۇرمىسىغا ئاساسەن، 2024- يىلى شىنجاڭنىڭ ئەدەبىيات ساھەسىدىكى ئالىي مۇكاپات − «تىيانشان ئەدەبىيات مۇكاپاتى» تەسىس قىلىندى، تۇنجى نۆۋەتلىك باھالاش پائالىيىتى 10- ئايدا باشلاندى. بۇ مۇكاپاتتا شىنجاڭ تېمىسىدىكى نادىر ئەدەبىي ئەسەرلەر تەقدىرلىنىدۇ، ئىتتىپاق- ئىناق، گۈللەنگەن، تەرەققىي قىلغان گۈزەل شىنجاڭنى نامايان قىلىپ، شىنجاڭ تېمىسىدىكى ئەدەبىي ئىجادىيەتنىڭ ئۈزلۈكسىز «يۇقىرى پەللە»گە قاراپ ئىلگىرىلىشىگە يېتەكچىلىك قىلىش مەقسەت قىلىنغان. بۇ مۇكاپات تۈرى ھەر ئىككى يىلدا بىر قېتىم باھالىنىدۇ. 

　تونۇشتۇرۇلۇشىچە، بۇ قېتىمقى توپلاش پائالىيىتىدە باھالاشقا قاتناشتۇرۇلىدىغان ئەسەرلەرنىڭ ژانىرى چەكلەنمەيدىكەن، رومان، پوۋېست، ھېكايە (توپلام)، نەسىر (توپلام)، ھۆججەت ئەدەبىياتى (توپلام)، شېئىر (توپلام)، سەھنە ئەسىرى (توپلام)، بالىلار ئەدەبىياتى (توپلام)، ئەدەبىيات نەزەرىيەسى، ئەدەبىي تەنقىد (توپلام) قاتارلىقلارنىڭ ھەممىسى باھالاشقا قاتناشتۇرۇلىدىكەن. ئەڭ ئاخىرىدا باھالاپ چىقىلغان ئەسەر بەشتىن ئاشمايدىكەن، شۇنىڭ بىلەن بىللە، باھالاپ چىقىلغان ئىسمىنى ئاتاش مۇكاپاتىغا ئېرىشكەن ئەسەرمۇ بەشتىن ئاشمايدىكەن ھەم شىنجاڭنىڭ ئەدەبىيات ئىشلىرىغا زور تۆھپە قوشقان يازغۇچىلارغا ئەھۋالغا قاراپ «كۆرۈنەرلىك تۆھپە مۇكاپاتى» بېرىلىدىكەن.

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)