ئاپتونوم رايونلۇق تۇنجى نۆۋەتلىك دوكتور ئاشتىلار يېڭىلىق يارىتىش، ئىگىلىك تىكلەش مۇسابىقىسىنىڭ ھەل قىلغۇچ مۇسابىقىسى پات ئارىدا ئۆتكۈزۈلىدۇ. مۇخبىرنىڭ 10- ئاينىڭ 26- كۈنى ئاپتونوم رايونلۇق ئادەم كۈچى بايلىقى ۋە ئىجتىمائىي كاپالەت نازارىتىدىن ئىگىلىشىچە، قايتا مۇسابىقە ئۆتكۈزۈپ باھالاپ بېكىتىش ئارقىلىق 105 تۈر تاللىنىپ، ئاپتونوم رايونلۇق تۇنجى نۆۋەتلىك دوكتور ئاشتىلار يېڭىلىق يارىتىش، ئىگىلىك تىكلەش مۇسابىقىسىنىڭ ھەل قىلغۇچ مۇسابىقە باسقۇچىغا كىرگەن.

　ئاپتونوم رايونلۇق تۇنجى نۆۋەتلىك دوكتور ئاشتىلار يېڭىلىق يارىتىش، ئىگىلىك تىكلەش مۇسابىقىسى 2000- يىلى ئاپتونوم رايون دوكتور ئاشتىلار تۈزۈمىنى يولغا قويغاندىن بۇيان ئۆتكۈزۈلگەن كۆلىمى ئەڭ چوڭ، قاتلىمى ئەڭ يۇقىرى، قاپلاش دائىرىسى ئەڭ كەڭ بولغان پۈتۈن شىنجاڭ خاراكتېرلىك دوكتور ئاشتىلار مۇسابىقىسى ھېسابلىنىدۇ. تىزىملىتىش خىزمىتى 8- ئايدا رەسمىي باشلانغاندىن بۇيان، جەمئىي 208 تۈر مۇسابىقىگە قاتنىشىشقا تىزىملىتىلغان، 38 ئورۇن قاتناشتۇرغان 154 تۈر قايتا مۇسابىقە باسقۇچىغا كىرگەن. پەن تەتقىقات ئورۇنلىرى، ئالىي مەكتەپ، كارخانىلاردىن كەلگەن 30 مۇتەخەسسىستىن تەشكىللەنگەن قايتا مۇسابىقە باھالاش مۇتەخەسسىسلەر گۇرۇپپىسى قايتا مۇسابىقە باسقۇچىغا كىرگەن 154 تۈرنى باھالاپ، ئاخىرىدا ھەل قىلغۇچ مۇسابىقە باسقۇچىغا كىرگەن 105 تۈرنى بېكىتكەن.

　بۇ قېتىمقى مۇسابىقىدە يېڭىلىق يارىتىش مۇسابىقىسى، ئىگىلىك تىكلەش مۇسابىقىسى ۋە قابىللار تېما ئېلىش مۇسابىقىسىدىن ئىبارەت ئۈچ تۈرلۈك مۇسابىقە تەسىس قىلىنغان. قابىللار تېما ئېلىش مۇسابىقىسىدە بىۋاسىتە كارخانا، پەن تەتقىقات ئورۇنلىرى، نۇقتىلىق تەجرىبىخانىلاردىن تېخنىكا ئېھتىياجى ئاشكارا توپلىنىپ، جەمئىيەتكە ئېھتىياج تىزىملىكى ئېلان قىلىنىدىغان بولغاچقا، مۇسابىقىگە قاتناشتۇرۇلىدىغان تۈرلەرنىڭ يېڭىلىق يارىتىش نەتىجىسى ۋە ئاچقۇچلۇق تېخنىكىسى چوقۇم ئېلان قىلىنغان ئېھتىياج ئۇچۇرىغا دەل جايىدا ئۇدۇل كېلىشى كېرەك، بۇمۇ باھالاشنىڭ مۇھىم ئاساسى.

　قابىللار تېما ئېلىش مۇسابىقىسى قايتا مۇسابىقىسىنىڭ باھالاش نەق مەيدانىدا شىنجاڭ يېزا ئىگىلىك پەنلەر ئاكادېمىيەسى تۇپراق- ئوغۇت ۋە يېزا ئىگىلىكىدە سۇ تېجەش تەتقىقات ئورنىنىڭ تەتقىقاتچىسى، بۇ مۇسابىقىدىكى مۇتەخەسسىسلەر باھالاش گۇرۇپپىسىنىڭ باشلىقى جاڭ يەن مۇنداق دېدى: «مۇسابىقە پەن تەتقىقات ئورۇنلىرىدىكى دوكتور ئاشتىلار توپىنىڭ بازارنى يېتەكچى قىلىپ پەن تەتقىقات يۆنىلىشىنى كېڭەيتىشىنى كەڭ سەھنە بىلەن تەمىنلىدى، شۇنداقلا كارخانىلارنىڭ تېخنىكا ئۆتكىلىگە ھۇجۇم قىلىشى ۋە دوكتور ئاشتىلار پونكىتىنىڭ تەرەققىياتى ئۈچۈن ئاساس سالدى».

　ئىگىلىنىشىچە، ھازىرغىچە ئاپتونوم رايوندا دوكتور ئاشتىلار پونكىتىدىن 191ى تەسىس قىلىنغان. بۇنىڭ ئىچىدە دوكتور ئاشتىلار پەن تەتقىقات كۆچمە پونكىتىدىن 34ى، دوكتور ئاشتىلار پەن تەتقىقات خىزمەت پونكىتىدىن 61ى، باغچە رايونى شۆبە پونكىتىدىن 31ى، ئاپتونوم رايوننىڭ دوكتور ئاشتىلار يېڭىلىق يارىتىش ئەمەلىيەت بازىسىدىن 65ى بار. ھازىرغىچە جەمئىي 1783 دوكتور ئاشتى قوبۇل قىلىنىپ تەربىيەلەندى، دوكتور ئاشتىلار تەتقىقات ساھەسى ئۈزلۈكسىز كېڭەيمەكتە.

　(«ئۈرۈمچى كەچلىك گېزىتى» پۈتۈن تاراتقۇ مۇخبىرى شى چۇەنجى خەۋىرى)