11- ئاينىڭ 15- كۈنى ئۈرۈمچى شەھىرى داۋانچىڭ رايونى ئاقسۇ يېزىسى گاۋيازى چارۋىچىلىق مەيدانى خىزمەت پونكىتىنىڭ ئاھالىسى شى شېڭيۈ مۇنداق دېدى: «ئۆيدىكى كونا توڭلاتقۇنى بۇ يېڭى توڭلاتقۇغا ئالماشتۇرۇپ، 400 نەچچە يۈەن تېجەپ قالدىم، ھەقىقەتەن ئەرزان توختىدى».

　يەنىمۇ ئىلگىرىلىگەن ھالدا ئىستېمال ھاياتىي كۈچىنى قوزغىتىپ، بازار ئىشەنچىنى ئۇرغۇتۇش ئۈچۈن، سودا مىنىستىرلىقى، دۆلەت تەرەققىيات ۋە ئىسلاھات كومىتېتى، مالىيە مىنىستىرلىقى قاتارلىق تارماقلار بىرلىكتە ئېلان قىلغان «ئىستېمال بۇيۇملىرىنىڭ كونىسىنى يېڭىسىغا ئالماشتۇرۇشقا تۈرتكە بولۇش ھەرىكەت لايىھەسى»، «كەڭ كۆلەملىك ئۈسكۈنە يېڭىلاش ۋە ئىستېمال بۇيۇملىرىنىڭ كونىسىنى يېڭىسىغا ئالماشتۇرۇشنى كۈچەپ قوللاشقا دائىر بىرقانچە تەدبىر» ۋە ئاپتونوم رايوننىڭ پائالىيەت ئورۇنلاشتۇرۇشىغا ئاساسەن، 9- ئاينىڭ ئاخىرىدا ئۈرۈمچى يېڭى بىر نۆۋەتلىك ئىستېمال بۇيۇملىرىنىڭ كونىسىنى يېڭىسىغا ئالماشتۇرۇش پائالىيىتىنى تېخىمۇ زور سالماق بىلەن يولغا قويدى، بۇ قېتىملىق پائالىيەت ئاپتوموبىل، ئائىلە ئېلېكتىر سايمانلىرى، توكلۇق ۋېلىسىپىت قاتارلىق ساھەلەرنى قاپلىغان، 2024- يىلى 12- ئاينىڭ 31- كۈنىگىچە داۋاملىشىدۇ.

　كونىسىنى يېڭىسىغا ئالماشتۇرۇش سىياسىتىنىڭ سىجىل تۈرتكىسىدە، بۇ يىلقى «قوش 11»دا كونىسىنى يېڭىسىغا ئالماشتۇرۇش ئىستېمالدىكى ئەڭ كۆپ تەكرارلانغان سۆزگە ئايلاندى. ئۈرۈمچى «قوش 11»دىكى ھەرقايسى چوڭ ئېلېكتىرونلۇق سودا سۇپىلىرىنىڭ ئىستېمال قىزىق نۇقتىلىرىنى چىڭ تۇتۇپ، 11- ئاينىڭ 1- كۈنىدىن 20- كۈنىگىچە «تور ۋە تور سىرتىدا سېتىشنى ئىلگىرى سۈرۈش، ئەمەلىي دۇكان ۋە تور دۇكىنىدا تەڭ كۈچەش» پائالىيىتىنى يولغا قويۇپ، ئىستېمال يوشۇرۇن كۈچىنى يەنىمۇ قېزىپ، ئىستېمال بازىرىنى سىجىل گۈللەندۈردى. ئائىلە ئېلېكتىر سايمانلىرىنى سېتىش كارخانىلىرىنىڭ ھەرقايسى دۇكانلىرى «كونىسىنى يېڭىسىغا ئالماشتۇرۇش» بويىچە دۆلەت ياردەم تولۇقلىمىسى ۋە شىنجاڭ ياردەم تولۇقلىمىسى پائالىيىتىنى قانات يايدۇرۇش بىلەن بىر ۋاقىتتا، ئىستېمالچىلارنى مول بولغان «قوش 11» سېتىشنى ئىلگىرى سۈرۈش پائالىيىتى بىلەن تەمىنلىدى، شەھەر ئاھالىلىرىنىڭ ئىستېمال قىزغىنلىقى يەنىمۇ ئاشتى.

　سىياسەتنىڭ تۈرتكىسىدە، تېخىمۇ كۆپ ئاھالە ئۆيىدىكى كونا ئائىلە ئېلېكتىر سايمانلىرىنى يېڭىلاشقا باشلىدى. داۋانچىڭ رايونىدىكى خەيئېر مەخسۇس سېتىش دۇكىنىنىڭ مەسئۇلى لى جيې مۇنداق دېدى: «دۇكاندا خېرىدارلار كۆرۈنەرلىك كۆپەيدى. كونىسىنى يېڭىسىغا ئالماشتۇرۇش سىياسىتى ئىستېمالچىلارغا نەپ يەتكۈزۈپلا قالماي، تىجارەتچىلەرگىمۇ ھەقىقىي پايدا ئېلىپ كەلدى. بۇ پۇرسەتتىن پايدىلىنىپ، دۇكىنىمىز يېقىندا يەنە يېڭى مەھسۇلاتلارنى كۆپەيتىپ، ئىستېمالچىلارنىڭ تاللىشىغا سۇندى». ( مۇخبىر شى چۇەنجى)