«ئىلىدا» ناملىق كىتاب 40 يىلدىن كېيىن قايتا نەشر قىلىندى، ئىككى مۇھەررىر ۋاڭ مېڭنىڭ شىنجاڭغا بولغان چوڭقۇر مۇھەببىتىنى بايان قىلدى

　سەي جۈن

　70 يىل توختىماي قەلەم تەۋرەتكەن خەلق سەنئەتكارى ۋاڭ مېڭ يېقىندا 90 ياشلىق تۇغۇلغان كۈنىنى كۈتۈۋالدى. ئۇنىڭغا ئۇلاپلا، يازغۇچىلار نەشرىياتى 40 يىلدىن كېيىن قايتا نەشر قىلغان «ئىلىدا» ناملىق كىتابنى ئېلان قىلىش ۋە مۇھاكىمە يىغىنى بېيجىڭدا داغدۇغىلىق ئۆتكۈزۈلدى. ئۇ يىغىندىن كېيىن ئاراممۇ ئالماي، كېيىنكى ئەدەبىيات ئالماشتۇرۇش پائالىيىتىگە ئاتلاندى.

　يېڭى جۇڭگودىكى تۇنجى ئەۋلاد يازغۇچى، خەلق سەنئەتكارى، داڭلىق يازغۇچى ۋاڭ مېڭ ۋە پېشقەدەم ئەدىبلەر جۇڭگو ھازىرقى زامان ئەدەبىياتىنىڭ تەرەققىيات يولى ۋە نەتىجىلىرىگە ئورتاق يېتەكچىلىك قىلدى ۋە گۇۋاھ بولدى، ۋاڭ مېڭمۇ نەۋقىران ۋاقتىدا شىنجاڭنى گۈللەندۈرۈش، شىنجاڭنى يېزىش دولقۇنىغا قوشۇلۇپ، شىنجاڭ، ھەتتا جۇڭگو ئەدەبىياتى مۇنبىرىدە بىر ئەدەبىيات ئابىدىسى تىكلىدى.

　1953- يىلى «ياشىسۇن ياشلىق» ناملىق ئەسەرنى ئىجاد قىلغاندىن باشلاپ، ۋاڭ مېڭ ئىلگىرى- كېيىن بولۇپ 26 مىليون خەتلىكتىن ئارتۇق ئەسەر ئېلان قىلدى، بۇلار 30 نەچچە خىل تىلغا تەرجىمە قىلىندى. 90 ياشقا كىرىپ قالغان ۋاڭ مېڭنىڭ ئىجادىيەت قىزغىنلىقى يەنىلا ئۇرغۇپ تۇرىدۇ، ھەر يىلى يېڭى ئەسەرلىرى بارلىققا كېلىۋاتىدۇ، ئۇ 16 يىلدىن ئارتۇق ياشىغان شىنجاڭدىن ئىبارەت بۇ مېھىرلىك تۇپراق ئۇنىڭ يېقىنقى يىللاردىن بۇيان ھەر يىلى يوقلاپ تۇرىدىغان «ئىككىنچى يۇرتى»، «ئىلىدا» ناملىق كىتابنىڭ قايتا نەشر قىلىنىشى بىلەن كىشىلەر ئۇ باسقان ئىزلارغا نەزەر سېلىپ، دىققىتىنى يەنە بىر قېتىم بۇ يەرگە مەركەزلەشتۈردى.

　ۋاڭ مېڭ يېڭى كىتابى توغرىسىدا توختالغاندا مۇنداق دېدى: ھەر قېتىم شىنجاڭ تىلغا ئېلىنسا، قاتتىق ھاياجانلىنىمەن، مەن ئىلىدا خۇشاللىق ۋە بەختنى ھەقىقىي ھېس قىلغانىدىم. مەن بۇ مېھىرلىك تۇپراقتىن ناھايىتى مىننەتدار.

　ۋاڭ مېڭ يېزىقچىلىق توغرىسىدا توختىلىپ مۇنداق دېدى: بۇ ئەسىرىمدە تۇرمۇشتىكى ئوڭۇشسىزلىق ۋە بەزى قىيىنچىلىقلارنى بايان قىلىشتىن ئۆزۈمنى قاچۇرمىدىم، ئومۇمىي جەھەتتىن ئېيتقاندا، ئەينى ۋاقىتتا پۈتكۈل جەمئىيەتتە ساقلانغان يېتەرسىزلىكلەر ۋە بىلىش جەھەتتىكى كەمتۈكلۈكلەرنى بايان قىلىشتىن ئۆزۈمنى قاچۇرمىدىم، ھالبۇكى، بۇ بىر مەھەللىك قىيىنچىلىق ۋە ئەگرى- توقايلىقلارنىڭ ھەممىسى سوتسىيالىزم ئىشلىرىنىڭ شانلىق مۇۋەپپەقىيەتلىرى ئۈچۈن قىلىنغان ئالدىنقى باسقۇچلۇق تەييارلىق ھېسابلىنىدۇ. ئەسىرىمدە يېڭى جۇڭگوغا، شىنجاڭ ئىلى ۋىلايىتىدىكى يېڭى تۇرمۇشقا، پارتىيە رەھبەرلىكىگە بولغان تولۇپ تاشقان ئىشەنچ نامايان قىلىندى، تەرەققىيات نەزەرى، پارتىيە ۋە خەلق ئىشلىرىدا زور مۇۋەپپەقىيەتلەرنىڭ قولغا كەلتۈرۈلۈشىگە بولغان زور ئۈمىدلەر ئىچىدە ئاساسىي مېلودىيە ياڭرىتىلدى.

　ۋاڭ مېڭ يازغۇچىلار نەشرىياتىنىڭ مۇھىم يازغۇچىسى ۋە قەدىناس دوستى بولۇپ، يازغۇچىلار نەشرىياتىدىكى نۇرغۇن رەھبەر ۋە مەسئۇل مۇھەررىر بىلەن چوڭقۇر دوستلۇق ئورناتقان، يازغۇچىلار نەشرىياتىدا 20دىن ئارتۇق كىتابى نەشر قىلىنغان. يۈەن يىفاڭ ۋە ئۇنىڭ ئۇستازى چېن شياۋفەن ۋاڭ مېڭ بىلەن نەچچە ئون يىل ئالاقە قىلغان ئىككى ئەۋلاد مۇھەررىر. بۇنىڭ ئىچىدە چېن شياۋفەن ۋاڭ مېڭنىڭ سەككىز ئەسىرىنى مەسئۇل بولۇپ تەھرىرلىگەن بولۇپ، ئىككىسىنىڭ خىزمەت ئالاقىسى 20 نەچچە يىل داۋاملاشقان.

　يۈەن يىفاڭ مۇنداق دېدى: «ۋاڭ مېڭنىڭ <ياشىسۇن ياشلىق> ناملىق ئەسىرى شۇ دەۋرنىڭ كارتىنىسى ئىدى، مانا ھازىر ئۇ 90 ياشقا كىرىپ قالغان بولسىمۇ، ياشلاردەك ئوچۇق- يورۇق، تېتىك، جۇشقۇن، قايناق ھېسسىياتقا باي. ئۇنىڭ يېزىقچىلىق ھاياتى قۇياش نۇرى ئاستىدا تۇرمۇشقا كۈلۈپ باققان ھاياتتۇر».

　ھاياتىي كۈچكە تولغان ئەسەر

　ۋاڭ مېڭ 1963- يىلى شىنجاڭغا كەلگەندە 29 ياشلىق يىگىت ئىدى، بېيجىڭغا قايتقاندا ئوتتۇرا ياشقا كىرىپ قالغان. ۋاڭ مېڭ نەۋقىران مەزگىلىنى شىنجاڭدا ئۆتكۈزدى. ئۇ ئىلىغا بولغان ئەسلىمىلىرىنى، شىنجاڭغا بولغان مېھىر- مۇھەببىتىنى سورۇنلاردا توختىماي تىلغا ئالىدۇ، ئۇ بىر قېتىملىق زىيارەتتە: «شىنجاڭدا، ئىلىدا، يېزىدا نۇرغۇن خۇشاللىقلارغا ئېرىشتىم» دېگەنىدى.

　ۋاڭ مېڭنىڭ شىنجاڭغا بولغان مۇھەببىتىنىڭ چوڭقۇرلۇقى توغرىسىدا نوپۇزلۇق مۇھەررىر يۈەن يىفاڭ چوڭقۇر تەسىراتقا ئىگە. ئۇ يېقىنقى يىللاردىن بۇيان، تەھرىر بۆلۈمىنىڭ سابىق مۇدىرى چېن شياۋفەن بىلەن ھەمكارلىشىپ، ۋاڭ مېڭنىڭ نۇرغۇن ئەسىرىنى تەھرىرلىدى، ۋاڭ مېڭ بىلەن تۇرمۇش، خىزمەت جەريانىدا بېرىش- كېلىش قىلىپ تۇردى، پات- پات ۋاڭ مېڭغا ھەمراھ بولۇپ ئالاقىدار كىتابلارغا ئائىت ئەدەبىيات پائالىيەتلىرىگە قاتناشتى. يۈەن يىفاڭ «ئىلىدا» ناملىق كىتابنىڭ مەسئۇل مۇھەررىرى بولۇش سۈپىتى بىلەن، كىتاب تەھرىرلەش، نەشر قىلىشنىڭ ھەربىر ھالقىسىغىچە تولۇق قاتناشتى.

　«ئىلىدا» ناملىق كىتابنى 1984- يىلى يازغۇچىلار نەشرىياتى نەشر قىلغان، ئەينى ۋاقىتتىكى كىتاب نامى «<ئىلىدا> ناملىق يۈرۈشلۈك ئەسەر- سۇس كۈل رەڭ كۆز قارىچۇقى» بولۇپ، توققۇز پارچە ئەسەر كىرگۈزۈلگەن. شۇنىڭدىن كېيىن، بەزى نەشرىياتلار بۇ كىتابنى نەشر قىلغان بولسىمۇ، لېكىن ھەممىسى ئەڭ دەسلەپكى نۇسخىسى ئەمەس ئىدى. 2023- يىلى يازغۇچىلار نەشرىياتى قۇرۇلغانلىقىنىڭ 70 يىللىقىنى تەبرىكلەش پائالىيىتىدە، ۋاڭ مېڭ ئەزىز مېھمان سۈپىتىدە سۆز قىلغاندا يېزىقچىلىق ھاياتىدىكى ئەڭ مۇھىم بىر نەچچە كىتابنى ئەسلەپ، 1984- يىلى يازغۇچىلار نەشرىياتى نەشر قىلغان «ئىلىدا» ناملىق كىتابنى تىلغا ئالغانىدى.

　يازغۇچىلار نەشرىياتى بۇ قېتىم بۇ كىتابنى قايتا نەشر قىلغاندا، ئەسلىي نۇسخىسى ئاساسىدا قايتىدىن تەھرىرلەپ تۈزىتىش كىرگۈزدى ھەمدە كېيىنكى نەشرىلىرىدە ئىشلىتىلمىگەن كىرىش سۆز − «يۇرتقا سەپەر − بايانداينى قايتا زىيارەت»نى بۇ قېتىمقى نەشرگە كىرگۈزدى. بۇ ئەسەرنى ۋاڭ مېڭ 1981- يىلى شىنجاڭدىن ئايرىلىپ ئىككى يىلغا يېقىن ۋاقىتتىن كېيىن، شىنجاڭ باياندايغا قايتىپ كەلگەندە دېھقان قېرىنداشلىرى بىلەن ھەمسۆھبەتتە بولغان جەرياننى چوڭقۇر مۇھەببەتلىك قەلىمى بىلەن يازغان، كىشىنى چوڭقۇر تەسىرلەندۈرىدۇ، بۇ ھەم «ئىلىدا» ناملىق ئەسەردىكى پېرسوناژ ۋە ھېكايىدە تەسۋىرلەنگەن ئەسلىي ئوبرازلارغا بېرىلگەن مۇھىم جاۋاب.

　يۈەن يىفاڭ مۇنداق دېدى: «بۇ ھاياتىي كۈچى ناھايىتى كۈچلۈك ئەسەر، گەرچە بۇ ئەسەر ئالدىنقى ئەسىرنىڭ 80- يىللىرىدا يېزىلغان بولسىمۇ، لېكىن شىنجاڭدىكى تۇرمۇش ئىنتايىن چىن تەسۋىرلەنگەن، شۇنداقلا ھەرقايسى مىللەتلەرنىڭ ئورتاق تۇرمۇشى، قان بىلەن گۆشتەك يۇغۇرۇلغانلىقى، جۇشقۇن، ئالغا ئىلگىرىلەيدىغان ھېسسىياتى ئىپادىلەنگەن».

　شىنجاڭ تۇپرىقىغا بولغان چوڭقۇر مۇھەببەت

　يۈەن يىفاڭ مۇنداق دېدى: پۈتكۈل نەشر قىلىنىش جەريانى ناھايىتى ئوڭۇشلۇق بولدى، بۇ مەزگىلدە ۋاڭ مېڭنىڭ شىنجاڭغا بولغان چوڭقۇر مۇھەببىتى توغرىسىدا ئەڭ چوڭقۇر تەسىراتقا ئىگە بولدۇم.

　يۈەن يىفاڭ مۇنداق دېدى: «ھەر قېتىملىق پائالىيەتتە ئۇ: شىنجاڭ مېنىڭ ئىككىنچى يۇرتۇم، دەيدۇ. ۋاڭ مېڭ ئۆزىگە مۇناسىۋەتلىك ئەدەبىيات پائالىيەتلىرىگە شىنجاڭدىكى دوستلىرىنى تەكلىپ قىلىپ نەق مەيداندا پىكىر ئالماشتۇرۇشنى ئۈمىد قىلىدۇ، شىنجاڭدىن كەلگەن دوستلىرىنى كۆرسىلا، ناھايىتى ھاياجانلىنىپ ۋە روھلىنىپ كېتىدۇ».

　يۈەن يىفاڭ مۇنداق دېدى: «ئۇنىڭ ئەسەرلىرى مەدەنىيەت ئاتلىغان ھالدا يېزىلغان بولۇپ، شۇ جايدىكى مىللەتلەرنىڭ تۇرمۇش مەنزىرىسى، ئادىتى تەسۋىرلەنگەن، يەنە شۇ جاينىڭ ئادەت سۆزى ئىشلىتىلگەن، ئۇ شىنجاڭدىكى ئاممىنىڭ بۇنىڭدىن ئاجايىپ، ئۆزگىچە مەدەنىيەت يۇغۇرۇلۇشىنى ھېس قىلىشىنى ئۈمىد قىلىدۇ. ئەمەلىيەتتە، ۋاڭ مېڭ ئۆزىنىڭ شىنجاڭ بايان قىلىنغان بارلىق ئەسەرلىرىنى ناھايىتى مۇھىم بىلىدۇ، شىنجاڭدا ياشىغان مەزگىلدە توپلىغان ئەسەر خام ماتېرىياللىرىنى ئۆز ھاياتىدىكى قىممەتلىك بايلىقىم، دەپ قارايدۇ. ئۇ شىنجاڭدا كەچۈرگەن تۇرمۇشىنى جاپالىق دەپ قارىماستىن، ئەكسىچە ئاشۇ تۇرمۇشقا رەھمەت ئېيتىدۇ، ھەمىشە شۇ مەزگىلنى مەن ئەڭ خۇشال بولغان كۈنلەر، دەپ ئاغزىدىن چۈشۈرمەيدۇ. ئۇ نۇرغۇن سورۇنلاردا سەمىمىيلىك بىلەن شۇنداق دېگەن».

　شىنجاڭدىن بېيجىڭغا قايتىپ بارغان ۋاڭ مېڭ ئالدىنقى ئەسىرنىڭ 70- يىللىرىنىڭ ئاخىرىدىن باشلاپ، «باشقارما باشلىقى مەمەتنىڭ ھېكايىسى»، «ئەبجەش رەڭ» قاتارلىق شىنجاڭ ئىلى تەسۋىرلەنگەن بىر قاتار ئەسەرلەرنى ئىجاد قىلدى، بولۇپمۇ «بۇ جاينىڭ مەنزىرىسى» رومانى بىلەن «ئىلىدا» ناملىق يۈرۈشلۈك ئەسىرى ۋاڭ مېڭنىڭ شىنجاڭ، بولۇپمۇ ئىلى تەسۋىرلەنگەن «ئىككى گۆھەر» ئەسىرى ھېسابلىنىدۇ. ۋاڭ مېڭ «بۇ يەرنىڭ مەنزىرىسى» قاتارلىق رومانلىرى ئارقىلىق بىر خىل ئۆزگىچە ئېستېتىكا شەكلى- «شىنجاڭ ئېستېتىكىسى»نى ياراتتى، ئۇنىڭ شىنجاڭ ئەدەبىيات مۇنبىرىدە يەرلىك ئەدەبىي ئىجادىيەتكە كۆرسەتكەن تەسىرى، ئەھمىيىتى زور بولدى.

　ۋاڭ مېڭ شىنجاڭغا بولغان مۇھەببىتى توغرىسىدا مۇنداق يازغان: شىنجاڭغا مۇناسىۋەتلىك بارلىق ئەسەرلىرىمدە ھەم شىنجاڭدىكى ھەر مىللەت خەلق، شىنجاڭنىڭ تاغ- دەريالىرى، تۇپرىقى، تۇرمۇشى، ئۆرپ- ئادىتىگە بولغان چوڭقۇر مۇھەببىتىم ئىپادىلەنگەن، ھەم ئەسەرلىرىمگە شۇ جايدىكى ئاممىنىڭ تۇرمۇشىغا بولغان ئىنچىكە چۈشەنچەم سىڭگەن، شۇنداقلا ھەرقايسى جەھەتلەرگە بولغان گۈزەل تىلەكلىرىم ئىپادىلەنگەن.

　ئەدەبىياتقا باغلانغان ئۆمۈرلۈك رىشتە

　يۈەن يىفاڭنىڭ ئۇستازى، يازغۇچىلار نەشرىياتىنىڭ ئالىي مۇھەررىرى چېن شياۋفەن بىلەن ۋاڭ مېڭ ئىككىسىنىڭ ئەدەبىيات سەۋەبلىك باغلانغان رىشتىسى تېخىمۇ چوڭقۇر.

　پېنسىيەگە چىققان چېن شياۋفەن ئەسلەپ مۇنداق دېدى: «ئۇستاز ۋاڭ مېڭ بىلەن تونۇشقىنىمىزغا 50 نەچچە يىل، ئەسەرلىرىنى تەھرىرلەشنى باشلىغىنىمغا 20 نەچچە يىل بولدى» .

　چېن شياۋفەننىڭ دادىسى ۋاڭ مېڭنىڭ شىنجاڭدىكى خىزمەتدىشى ئىدى. ئۇ خاڭجوۋدا تۇغۇلۇپ، باشلانغۇچ مەكتەپتە ئوقۇۋاتقان چېغىدا ئۈرۈمچىگە كېلىپ ئاتا- ئانىسى بىلەن بىللە تۇرمۇش كەچۈرگەن، سەككىز يېشىدا «مېڭ تاغا»سى بىلەن تۇنجى قېتىم كۆرۈشكەن. «ئۇ چاغدا ئۇستاز ۋاڭ مېڭ كادىرلار مەكتىپىدە تاماق ئېتەتتى، ئاشپەزلەر بەنىنىڭ بەنجاڭى ئىدى. ئۈرۈمچىگە قايتىپ كەلگەندىن كېيىن، بىز ئىككى ئائىلە دائىم بېرىش- كېلىش قىلدۇق. ئۇ بەزىدە بىزنىڭ ئۆيگە كېلىپ دادام بىلەن پاراڭلىشاتتى، بىزمۇ ئۇنىڭ ئۆيىگە بېرىپ مېھمان بولاتتۇق» دېدى ئۇ.

　چېن شياۋفەن ئالدىنقى ئەسىرنىڭ 80- يىللىرىنىڭ بېشىدا داشۆگە ئۆتكەندىن كېيىن، ۋاڭ مېڭنىڭ ئىنتايىن داڭلىق يازغۇچى ئىكەنلىكىنى بىلدى، ئۇ ھەر قېتىم ئۈرۈمچىگە قايتقىنىدا ئۆيىدىكى كىتاب جازىسىدا ۋاڭ مېڭنىڭ ئاتا- ئانىسىغا ھەدىيە قىلغان يېڭى ئەسەرلىرىنىڭ پەيدا بولۇپ قالغانلىقىنى بايقايتتى. ئۇنىڭ ئاتا- ئانىسىمۇ ۋاڭ مېڭنىڭ سادىق ئوقۇرمىنى ئىدى.

　كۆپ يىللاردىن كېيىن، چېن شياۋفەن يازغۇچىلار نەشرىياتىنىڭ مۇھەررىرى بولدى، بىر قېتىملىق يىغىلىشتا، چېن شياۋفەن ئۇستاز ۋاڭ مېڭ بىلەن ئۇ تەتقىق قىلىپ يازغان «قىزىل راۋاقتىكى چۈش»كە ئائىت ماقالىلەرنى توپلام قىلىش توغرىسىدا پاراڭلاشتى. بۇ چېن شياۋفەن تەھرىرلىگەن ۋاڭ مېڭنىڭ تۇنجى ئەسىرى «ۋاڭ مېڭنىڭ <قىزىل راۋاقتىكى چۈش> ھەققىدىكى جانلىق بايانلىرى» ئىدى.

　تۇنجى قېتىملىق ھەمكارلىشىشتىن كېيىن، ۋاڭ مېڭ چېن شياۋفەننىڭ كەسپىي سەۋىيەسىنى مۇئەييەنلەشتۈردى. چېن شياۋفەن مۇھەررىرلىك ھاياتىدا ۋاڭ مېڭنىڭ سەككىز ئەسىرىنى تەھرىرلىدى، بۇنىڭ ئىچىدە ماۋدۇن ئەدەبىيات مۇكاپاتىغا ئېرىشكەن «بۇ يەرنىڭ مەنزىرىسى» ناملىق ئەسەرمۇ بار. چېن شياۋفەن مۇنداق دېدى: «بۇ مېنىڭ كۆپ نەپكە ئېرىشكەن تەھرىرلىك كەچۈرمىشىم بولۇپ قالدى».

　شىنجاڭ تېمىسى ۋاڭ مېڭنىڭ ئىجادىيەت ھاياتىدا ئىنتايىن مۇھىم ئورۇندا تۇراتتى. چېن شياۋفەن ۋاڭ مېڭنىڭ دەسلەپكى مەزگىلدىكى ۋەكىللىك ئەسەرلىرى بولغان «تەشكىلات بۆلۈمىگە يېڭى كەلگەن ياش»، «ئىلگىرىكى تۇنجى مۇھەببەت»، «ياشىسۇن ياشلىق» قاتارلىق ياشلىق تېمىسىدىكى يۈرۈشلۈك ئەسەرلىرىدە قويۇق ئەدەبىيات- سەنئەت پۇرىقى، ساپ ۋە رومانتىك ھېسسىياتنىڭ بارلىقىنى، «بۇ يەرنىڭ مەنزىرىسى»، «ئىلىدا»دىن باشلاپ قىزىقارلىق ۋە يۇمۇرىستىك تۇيغۇنىڭ كۆپىيىپ، تۇرمۇش بىلەن تېخىمۇ زىچ باغلانغانلىقىنى چوڭقۇر ھېس قىلدى.

　قۇياش نۇرىغا چۆمۈلگەن ھايات

　كۆپ يىللىق ئالاقە جەريانىدا، چېن شياۋفەننىڭ ۋاڭ مېڭ ھەققىدىكى ئەڭ چوڭقۇر تەسىراتى شۇكى، ئۇنىڭ ھاياتى قۇياش نۇرىغا چۆمۈلگەن ھايات ئىدى.

　چېن شياۋفەن مۇنداق دېدى: «ئۇنىڭ ئۈمىدۋار روھىي ھالىتى مېنى ئاجايىپ مەپتۇن قىلاتتى، ئۇ ھەرقانداق ئىشنى كۆتۈرەڭگۈ- خۇشال كەيپىياتتا قىلاتتى، ئۇنىڭ ئۈستىگە، ئۇ مەڭگۈ مۇشۇنداق ئۈمىدۋار ئىدى».

　«بۇ يەرنىڭ مەنزىرىسى»نى مىسال قىلساق، ئۇ 600 مىڭ خەتتىن ئارتۇق بۇ رومانىنى ئالدىنقى ئەسىرنىڭ 70- يىللىرىنىڭ بېشىدا تۆت يىل ۋاقىت سەرپ قىلىپ يازغان، لېكىن تۈرلۈك سەۋەبلەر تۈپەيلىدىن نەشر قىلىنمىغاچقا، كىتابتىكى بىر قىسىم خام ماتېرىياللاردىن پايدىلىنىپ پوۋېست، ھېكايىلەرنى يازغان، «ئىلىدا» ناملىق كىتاب مۇشۇ ئاساستا بارلىققا كەلگەن. 40 يىلدىن كېيىن، «بۇ يەرنىڭ مەنزىرىسى» قايتىدىن روياپقا چىقىپ نەشر قىلىندى ھەم بىراقلا ماۋدۇن ئەدەبىيات مۇكاپاتىغا ئېرىشتى.

　ۋاڭ مېڭنىڭ يەنە بىر ئالاھىدىلىكى شۇكى، ئۇ ئىشنى ناھايىتى ئۈنۈملۈك قىلىدۇ، بۇنىڭغا دوستلىرىمۇ قايىل. چېن شياۋفەن مۇنداق دېدى: «ئۇنىڭ قانداق ئويى بولسا، ئۇدۇللا دەۋېرىدۇ، ئەزەلدىن ئەگىتىپ ئولتۇرمايدۇ، لېكىن ناھايىتى بەدىئىي، ھېسسىياتلىق ھالدا سۆزلەپ، ئاڭلىغۇچىلارنى چىن كۆڭلىدىن قايىل قىلىدۇ».

　ۋاڭ مېڭ ئىلگىرى مۇھاكىمە يىغىنىدا مۇنداق دېگەن: «بەزى يازغۇچىلار ئازاب- ئوقۇبەتلەرنى يېزىشقا ماھىر، لېكىن مەن ھەمىشە تۇرمۇشنىڭ ماڭا قىلغان سوۋغىلىرى ناھايىتى كۆپ دەپ قارايمەن، شۇڭا ئاكتىپ كۈچ، ئۈمىدۋارلىققا تولغان ئەسەرلەرنى ياخشى كۆرىمەن». ۋاڭ مېڭ ھاياتىدا باشتىن كەچۈرگەن ئەگرى- توقايلىقلارنى ئۈمىدكە ۋە ھەرىكەتلەندۈرگۈچى كۈچكە ئايلاندۇردى، ئۇ ئۆزىنى خۇددى نەچچە يۈز يىل ياشىغاندەك ھېس قىلىدۇ.

　چېن شياۋفەن مۇنداق دېدى: «ئۇ تۇرمۇشنى چوڭقۇر چۈشەنگەن، قانداق تۇرمۇش كەچۈرۈشنى، تۇرمۇشتىن ھۇزۇرلىنىشنى بىلىدىغان ئادەم. ئۇ ئۆزىنى تۇرمۇشنى قىزغىن سۆيگۈچى، دەيدۇ. ۋاڭ مېڭنىڭ <بۇ يەرنىڭ مەنزىرىسى> ۋە <ئىلىدا> ناملىق ئەسەرنى بۇنداق ياخشى يېزىپ چىقىشىدىكى سەۋەب شۇكى، ئۇنىڭ شىنجاڭغا بېرىشى سەيلە- ساياھەت قىلىش، ئۆزگىچە تۇرمۇشنى ھېس قىلىپ بېقىش ئۈچۈن ئەمەس، ئەكسىچە شىنجاڭدا تۇرمۇش كەچۈرۈش ۋە ئۇ خىل تۇرمۇشقا ھەقىقىي سىڭىشىش ئۈچۈندۇر، بۇ ئۇنى كۈچلۈك ئىجادىيەت كۈچى ۋە ھاياتىي كۈچكە ئىگە قىلغان».