11- ئاينىڭ 28- كۈنى، ئاپتونوم رايونلۇق بازار نازارەت قىلىش- باشقۇرۇش ئىدارىسى 2024- يىللىق ئاپتونوم رايونىمىزدىكى بوۋاقلار ھەم بالىلار كىيىم- كېچەكلىرى، ئوتتۇرا، باشلانغۇچ مەكتەپ ئوقۇغۇچىلىرىنىڭ مەكتەپ فورمىسىنىڭ سۈپىتىنى نازارەت قىلىپ ئارىلاپ تەكشۈرۈش ئەھۋالىنى ئېلان قىلدى.

　ئارىلاپ تەكشۈرۈشتە لاياقەتسىز مەھسۇلات ساتقان ئورۇندىن بىرى، لاياقەتسىز مەھسۇلات ئىشلەپچىقارغان ئورۇندىن تۆتى بايقالدى. ئۇلار ئايرىم- ئايرىم ھالدا: ئاقسۇ جىنچياۋ (金桥) تاللا بازىرى چەكلىك مەسئۇلىيەت شىركىتى، كورلا شەھىرى جيېيا (洁雅) كىيىم- كېچەك زاۋۇتى، شىنجاڭ ياپېيمۇچىڭ (雅佩木青) كىيىم- كېچەك چەكلىك مەسئۇلىيەت شىركىتى، شىنجاڭ يىماۋ (亿茂) توقۇلما بۇيۇملارنى ياساش چەكلىك شىركىتى، جىمىسار ناھىيەسى جياشۈەن (佳轩) سودا چەكلىك شىركىتىدىن ئىبارەت.

　ئارىلاپ تەكشۈرۈش ئەھۋالىغا ئاساسلانغاندا، بوۋاقلار ھەم بالىلار كىيىم- كېچەكلىرى سېتىلىدىغان 15 ئورۇننىڭ 30 تۈركۈم قېتىم مەھسۇلاتىدىن نەق مەيداندا ئەۋرىشكە ئېلىنغان، سېتىش ئورۇنلىرى پۈتۈن ئاپتونوم رايوندىكى 10 ۋىلايەت، ئوبلاستقا چېتىلغان، مەھسۇلات بەلگىسىدە كۆرسىتىلگەن ئىشلەپچىقىرىش كارخانىلىرى ھەر قايسى جايلاردىكى 17 ئىشلەپچىقىرىش ئورنىغا چېتىلغان. ئوتتۇرا، باشلانغۇچ مەكتەپ ئوقۇغۇچىلىرىنىڭ مەكتەپ فورمىسى ئىشلەپچىقىرىلىدىغان 46 ئورۇننىڭ 100 تۈركۈم قېتىم مەھسۇلاتىدىن نەق مەيداندا ئەۋرىشكە ئېلىنغان، ئىشلەپچىقىرىش ئورۇنلىرى پۈتۈن ئاپتونوم رايوندىكى 14 ۋىلايەت، ئوبلاست، شەھەرنى قاپلىغان.

　بۇنىڭ ئىچىدە، بوۋاقلار ھەم بالىلار كىيىم- كېچەكلىرىنىڭ تەكشۈرۈلىدىغان تۈرلىرى تالا مىقدارى، فورمالىن مىقدارى، pH قىممىتى، قۇرۇق ھالەتتە سۈركىلىشكە ئۇچرىغاندا رەڭ ئۆزگىرىشكە چىدامچانلىقى، نەم ھالەتتە سۈركىلىشكە ئۇچرىغاندا رەڭ ئۆزگىرىشكە چىدامچانلىقى، سۇغا چىلانغاندىن كېيىن رەڭ ئۆزگىرىشكە چىدامچانلىقى، تەر دېغىنىڭ رەڭ ئۆزگەرتىشىگە چىدامچانلىقى (كىسلاتاغا، ئىشقارغا چىداملىقى)، شۆلگەي سۇيۇقلۇقى ئاستىدا رەڭ ئۆزگىرىشكە چىدامچانلىقى، راك پەيدا قىلغۇچى ئاروماتىك ئامىن بوياقلىرىنى پارچىلىيالايدىغان، توقۇلما بويۇملارغا ئورنىتىلغان قوشۇمچە نەرسىلەرنىڭ ئۆتكۈرلۈكى، بوغقۇچ تەلىپى قاتارلىق 11 تۈرنى ئۆز ئىچىگە ئالىدۇ. نازارەت قىلىپ ئارىلاپ تەكشۈرۈش ئارقىلىق، لاياقەتسىز مەھسۇلات بىر تۈركۈم قېتىم بولۇپ، تالا مىقدارىنىڭ ئەمەلىي ئۆلچەنگەن قىممىتى بىلەن ئېنىق كۆرسەتمىنىڭ ماس كەلمىگەنلىكى بايقالدى. ئېنىق كۆرسىتىلگەن تالا مىقدارى «%85 پاختا، %15 پولىئېستېر تالاسى» بولۇپ، ئەمەلىي ئۆلچەش نەتىجىسىدە «%100 پاختا» بولغان.

　پايدىلانغان مەنبە: ئاپتونوم رايونلۇق بازار نازارەت قىلىش- باشقۇرۇش ئىدارىسى

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)