ئانار بۇلۇت \ شىنجاڭ گېزىتى خەۋىرى (مۇخبىر زوۋ يى فوتوسى، خەۋىرى) «ئىلگىرى بوران چىقسىلا قۇم- توپا توزۇيتتى، ھازىر بوران چىقسا قۇم- توپىنى ئىھاتە ئورمىنى توسۇۋالىدۇ، بىزنىڭ ئۆيدىن يەتتە كىلومېتىر يىراقلىقتىكى قۇملۇق بۈگۈنكى كۈندە <قۇم دېڭىزى> مەنزىرىسىگە ئايلاندى»، دېدى 11- ئاينىڭ 28- كۈنى، قاغىلىق ناھىيەسىدىكى 200 مىڭ مو ئېكولوگىيەلىك ئورمان بازىسىنىڭ ئورمان مۇھاپىزەتچىسى پەيزۇللا كېرىمۇللا مەنزىرە كۆرۈش سۇپىسىدا يىراقتىكى قۇملۇقنى كۆرسىتىپ تۇرۇپ. شۇ كۈنى چۈشتىن بۇرۇن، تەكلىماكان قۇملۇقىنىڭ چېتىدىكى توسۇپ زەربە بېرىش جېڭىدە بوش قالغان رايونلارنى قاشالاپ «تۇتاشتۇرۇش» ئىشقا ئاشۇرۇلدى.

　بىر يىلدىن كۆپرەك ۋاقىتتىن بۇيان، «قاشالاش» ۋەزىپىسىگە چېتىلىدىغان قەشقەر ۋىلايىتى، خوتەن ۋىلايىتى، بايىنغولىن موڭغۇل ئاپتونوم ئوبلاستى ئۆز يېرىنىڭ ئەھۋالىغا قاراپ ئىش كۆرۈپ، تۈرگە ئايرىپ تەدبىر قوللىنىپ، بىيولوگىيەلىك قۇم تىزگىنلەش، قۇرۇلۇش ئارقىلىق قۇمنى تۇراقلاشتۇرۇش، يورۇقلۇق ۋولت ئارقىلىق قۇم تىزگىنلەش قاتارلىق كۆپ خىل تەدبىرنى تەڭ قوللىنىپ، قاشالاپ «تۇتاشتۇرۇش»نى ئوڭۇشلۇق ئىشقا ئاشۇردى.

　گۇما ناھىيەسىنىڭ زاڭگۇي يېزىسىغا جايلاشقان شىنجاڭ خۇييۆجى بىيو پەن- تېخنىكا چەكلىك شىركىتىنىڭ گۇالوۋ تېرىش بازىسى قۇملۇق توپىنى توسۇپلا قالماي، يەنە شۇ جايدىكى ئاممىنىڭ ئىشقا ئورۇنلىشىشىغا تۈرتكە بولدى؛ قاغىلىق ناھىيەسى لوق يېزىسى دۆلەت يولى شىمالىي تەرىپىگە جايلاشقان قاشالانغان بوش رايوندىكى تۇتاش كەتكەن قۇمدىن مۇداپىئەلىنىش تورى قۇملۇقتىكى «ئالتۇن رەڭلىك لېنتا»غا ئوخشاش كۆچمە قۇم بارخانلىرىنى مۇقىملاشتۇردى؛ قاغىلىق ناھىيەسىدىكى 200 مىڭ مو ئېكولوگىيە ئورمىنى بازىسىدا، ئاق تېرەك، توغراق ۋە جىگدە دەرەخلىرى «قول تۇتۇشۇپ» قۇم دېڭىزىنى ئايرىپ، ئادەم قۇمنى چېكىندۈرىدىغان ئۇلۇغ ئىشنى ۋۇجۇدقا چىقاردى.

(نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.)