يېقىندا، مائارىپ مىنىستىرلىقى، مەركىزىي كومىتېت تەشۋىقات بۆلۈمى «42- تۈركۈمدە پۈتۈن مەملىكەتتىكى ئوتتۇرا-باشلانغۇچ مەكتەپ ئوقۇغۇچىلىرىغا تەۋسىيە قىلىنغان مۇنەۋۋەر فىلىملەر مۇندەرىجىسى»نى ئېلان قىلدى، جەمئىي 31 فىلىم تاللاندى، بۇنىڭ ئىچىدە شىنجاڭ تېمىسىدىكى فىلىم «كىچىك قامچا» بار.

　«كىچىك قامچا» ناملىق كىنونى ئاپتونوم رايونلۇق پارتىيە كومىتېتى تەشۋىقات بۆلۈمى تەشكىللەپ پىلانلىغان، تىيانشان كىنو ئىستۇدىيەسى سېنارىيەلەشتۈرۈپ سۈرەتكە ئالغان. فىلىمدە قازاق ئوغۇل بالا ئاڭسارنىڭ ئات مىنىپ ئارزۇسىنى ئىشقا ئاشۇرۇش توغرىسىدىكى ھېكايىسى بايان قىلىنغان: ئاڭسار ئات مىنىپ «بارلىق رىقابەتچىسىنى يېڭىش»نى ئارزۇ قىلغان بولسىمۇ، لېكىن تۈرلۈك سەۋەبلەر تۈپەيلىدىن ئىزچىل ئۆزىگە تەۋە ئېتى بولماي كەلگەن. بىر كۈنى، دادىسىنىڭ يېقىن دوستى فېيلەيكې ئىسىملىك بىر ئاتنى ئۇلارغا سوۋغا قىلىدۇ. ئاكىسى بىلەن ئات مىنىش ھوقۇقىنى تالىشىۋاتقاندا، فېيلەيكې تاسادىپىي يارىلىنىدۇ. فېيلەيكېنى قۇتقۇزۇش جەريانىدا، ئاڭسار فېيلەيكې بىلەن چوڭقۇر رىشتە ئورنىتىپلا قالماي، يەنە شياۋ مېيلى ئىسىملىك بىر كىچىك قىزچاق بىلەن تونۇشۇپ قالىدۇ. شياۋ مېيلى بىلەن ئۇنىڭ دادىسىنىڭ ھېكايىسىنى بىلگەندىن كېيىن، ئاڭسار تېخىمۇ چوڭ بىر ئارزۇغا، يەنى شياۋ مېيلىنىڭ دادىسىنى تېپىشىغا ياردەم بېرىش قارارىغا كېلىدۇ.

　«كىچىك قامچا» فىلىمىدە مېھىر-مۇھەببەت ۋە ياخشىلىق، ئۆسۈپ يېتىلىش ۋە ئارزۇ، جاسارەت ۋە ئىشەنچكە تولغان ھېكايە تەسۋىرلىنىپلا قالماي، تېخىمۇ مۇھىمى جۇڭخۇا مىللىتىنىڭ ئىتتىپاقلىشىپ ئۆزئارا ياردەم بېرىش، مەدەنىيەتنىڭ يۇغۇرۇلۇشى، قان قېرىنداش بولۇش ھېكايىسى بايان قىلىنغان. كۆرۈرمەنلەرگە جۇڭخۇا زېمىنىدىكى ئوخشاش بولمىغان مىللەتلەر ئارىسىدىكى ئوخشاش مەدەنىيەت ئىدىيەسىنى يەتكۈزۈپ، سىرتقى دۇنياغا شىنجاڭدىكى ھەر مىللەت خەلقنىڭ تىنچ، ئىتتىپاق بولغان بەختلىك تۇرمۇشى ۋە شىنجاڭنىڭ گۈزەل تەبىئىي مەنزىرىسى تولۇق نامايان قىلىنغان.

　36- نۆۋەتلىك جۇڭگو كىنو ئالتۇن خوراز مۇكاپاتىنى باھالاشتا، «كىچىك قامچا» فىلىمى ئەڭ ياخشى بالىلار فىلىمى، ئەڭ ياخشى مۇزىكىدىن ئىبارەت ئىككى تۈردە نامزاتلىققا كۆرسىتىلدى. 28- نۆۋەتلىك خەلقئارا بالىلار، ياش- ئۆسمۈرلەر كىنو بايرىمىدا «كىچىك قامچا» فىلىمى بىرلەشكەن دۆلەتلەر تەشكىلاتى مائارىپ- پەن- مەدەنىيەت تەشكىلاتى خەلقئارا بالىلار كىنو مەركىزى تارقاتقان ئەڭ ياخشى كىنو مۇكاپاتىغا ئېرىشتى.

　تىلغا ئېلىشقا ئەرزىيدىغىنى شۇكى، كەسپىي بولمىغان نۇرغۇن ئارتىس فىلىمدە ئاددىي، ساپ ئوبرازلارنى ياراتتى، بولۇپمۇ بىرنەچچە كىچىك باش پېرسوناژنىڭ ھەممىسى ئالتاي، ئىلىدىكى ئوقۇغۇچىلار ئىدى.