شىنجاڭ خۇڭشۇلىن خەلقئارا چاڭغا تېيىلىش ئىستىراھەت رايونى پات ئارىدا قار ھاسىل قىلىش باسقۇچىغا كىرىدۇ، 12- ئاينىڭ 31- كۈنى تىجارەت باشلاپ ساياھەتچىلەرنى كۈتۈۋېلىش پىلانلاندى.

　مۇخبىرنىڭ 12- ئاينىڭ 11- كۈنى ئىگىلىشىچە، ھازىر قار ھاسىل قىلىشقا ئىشلىتىلىدىغان سۇ بىلەن تەمىنلەش تۇرۇبا لىنىيەسى ئورنىتىلىپ بولغان، قار ھاسىل قىلىشقا ئىشلىتىلىدىغان سۇ ساقلاش كۆلچىكىنىڭ سۇ ساقلاش مىقدارى 16 مىڭ كۇب مېتىرغا يەتكۈزۈلگەن بولۇپ، 12- ئاينىڭ 20- كۈنىدىن باشلاپ قار ھاسىل قىلىنىدىكەن، 12- ئاينىڭ 28- كۈنىدىن بۇرۇن سۈنئىي قار ھاسىل قىلىش ۋە چاڭغا تېيىلىش سايمانلىرى زالىنىڭ ھەرقايسى رايونلىرىنى بېزەش، مۇكەممەللەشتۈرۈش خىزمىتى تاماملىنىدىكەن.

　بۇ يىل 8- ئايدا قۇرۇلۇش باشلانغان شىنجاڭ خۇڭشۇلىن خەلقئارا چاڭغا تېيىلىش ئىستىراھەت رايونى ئۈرۈمچى شەھىرى شىمىگۇ رايونى شىرېنزىگوۋغا جايلاشقان بولۇپ، «جۇڭگو- شىنجاڭ خۇڭشۇلىن كەلگۈسى شەھەر خەلقئارا ئىستىراھەت كەنتى»نىڭ 1- قارارلىق تۈر قۇرۇلۇشى ھېسابلىنىدۇ. بۇ تۈر قۇرۇلۇشى A ،B ئىككى رايوندىن تەركىب تاپقان، پىلانلانغان يەر كۆلىمى 3100 مو بولۇپ، ئۈرۈمچىنىڭ يېقىن شەھەر ئەتراپىدىكى چاڭغا تېيىلىش، ئارام ئېلىش، ئىستىراھەت، كۆڭۈل ئېچىش بىر گەۋدىلەشكەن ئارام ئېلىش- كۆڭۈل ئېچىش ئۇنىۋېرسال گەۋدىسى ھېسابلىنىدۇ.

　ھازىر 1- قارارلىق قۇرۇلۇش تۈرىدىكى دەسلەپكى سەۋىيەدىكىلەر چاڭغا تېيىلىش يولىدىن تۆتى، چاڭغا تېيىلىش چاقى يولىدىن ئالتىسى ئاساسىي جەھەتتىن پۈتتى، چاڭغا تېيىلىش ئىستىراھەت رايونى قۇرۇلۇش نەق مەيدانىدا ئوچۇق رەڭدە سىرلانغان 600 كىۋادرات مېتىرلىق چاڭغا تېيىلىش سايمانلىرى زالى بار، 270 مېتىر ئۇزۇنلۇقتىكى دەسلەپكى سەۋىيەدىكىلەر چاڭغا تېيىلىش يولىدىن تۆتى، 200 مېتىر ئۇزۇنلۇقتىكى چاڭغا تېيىلىش چاقى يولىدىن ئالتىسى ياسىلىپ بولغان بولۇپ، قېزىش ماشىنىسى باغچە ئىچىدىكى مەيدانلارنى تۈزلەۋاتىدۇ. 320 مېتىر ئۇزۇنلۇقتىكى توكلۇق يول، بىخەتەرلىك تورى قاتارلىق بىخەتەرلىك مۇداپىئە ئەسلىھەلىرى ۋە يورۇتۇش ئەسلىھەلىرى 12- ئاينىڭ 25- كۈنىدىن بۇرۇن قۇراشتۇرۇلۇپ بولۇنىدۇ.

　شىنجاڭ خۇڭشۇلىن خەلقئارا چاڭغا تېيىلىش ئىستىراھەت رايونى چاڭغا تېيىلىش ئىشلىرى بۆلۈمىنىڭ مەسئۇلى ليۇ يۈ مۇنداق دېدى: چاڭغا تېيىلىش ئىستىراھەت رايونى پۈتكەندىن كېيىن بىرلا ۋاقىتتا 1500 چاڭغا تېيىلىش ھەۋەسكارىنىڭ قار- مۇز تەنھەرىكىتىگە قاتنىشىش ئېھتىياجىنى ھەم ساياھەتچىلەرنىڭ قارلىق موتوسىكلىتى، ئات قېتىلىدىغان چانا قاتارلىق قار- مۇز كۆڭۈل ئېچىش تۈرلىرىدىن بەھرىلىنىش ئېھتىياجىنى قاندۇرىدۇ.