ئانار بۇلۇت \ شىنجاڭ گېزىتى خەۋىرى (مۇخبىر جاۋ مېي) 3- ئاينىڭ 3- كۈنى، مۇخبىرنىڭ كۇچا شەھەرلىك مەدەنىيەت- تەنتەربىيە- رادىيو- تېلېۋىزىيە ۋە ساياھەت ئىدارىسىدىن ئىگىلىشىچە، كۇچا شەھىرى كۈسەن مۇزېيىنىڭ بىر يىل داۋاملاشقان قۇرۇلۇش خىزمىتى نۆۋەتتە كۆرگەزمىنى ئورۇنلاشتۇرۇش باسقۇچىغا كىرگەن، ھازىر مۇزېينىڭ تاشقى كۆرۈنۈشى بىلەن ئىچىنى بېزەش قۇرۇلۇشى ئېلىپ بېرىلىۋاتقان بولۇپ، 5- ئاينىڭ بېشىدا مۇزېينى رەسمىي ئېچىش پىلانلانغان.

　بۇ مۇزېي كۇچا شەھىرىنىڭ دوستلۇق يولىغا جايلاشقان بولۇپ، كۈسەن ۋېي، جىن سۇلالىلىرى قەدىمىي قەبرىستانلىقى خارابىسى مۇزېيى بىلەن قوشنا. دۆلەت ئىچىدىكى كۈسەن مەدەنىيىتى يادرو قىلىنغان تۇنجى ئۇنىۋېرسال مۇزېي بولۇش سۈپىتى بىلەن، ئۇنىڭ قۇرۇلۇش كۆلىمى 16 مىڭ 201 كىۋادرات مېتىر كېلىدۇ، ئاساسىي قۇرۇلۇش جەمئىي ئۈچ قەۋەت، ئۇنىڭدا ئاساسلىقى كۈسەن تارىخىي مەدەنىيەت كۆرگەزمە زالى، كۈسەن قەدىمىي شەھىرى مەخسۇس تېمىلىق كۆرگەزمە زالى، كۈسەن بۇددا دىنى مەدەنىيەت- سەنئەت مەخسۇس تېمىلىق كۆرگەزمە زالى ھەم ئىككى ۋاقىتلىق كۆرگەزمە زالى تەسىس قىلىنغان.　　

　كۇچا قەدىمدە «كۈسەن» دەپ ئاتالغان، قەدىمىي يىپەك يولىدىكى مۇھىم بازار بولۇش سۈپىتى بىلەن، خەن سۇلالىسى دەۋرىدىن باشلاپلا ئوتتۇرا تۈزلەڭلىك ھاكىمىيىتى بىلەن زىچ باغلىنىشنى ساقلىغان بولۇپ، خەن، تاڭ سۇلالىلىرى دەۋرىدە مەركىزىي ھۆكۈمەتنىڭ غەربىي يۇرتتىكى سىياسىي، ئىقتىساد، مەدەنىيەت تۈگۈنى بولغان. ئۇنىڭ كۆپ خىللىق ئۆزئارا يۇغۇرۇلغان مەدەنىيەت مىراسلىرى قەدىمكى دەۋردىكى جۇڭخۇا سەنئىتىنىڭ ئۈلگىسى بولۇپلا قالماي، غەربىي يۇرت بىلەن ئوتتۇرا تۈزلەڭلىكنىڭ مەدەنىيەت جەھەتتە ئۆزئارا تۇتاشقان، مەنىۋى جەھەتتە ئۆزئارا باغلانغان تارىخىي تومۇرىنى تېخىمۇ چوڭقۇر ئىسپاتلاپ بەردى.