ھازىر خوشۇت ناھىيەسىدىكى ھىڭگانلار تۆللەش، سۈت بېرىش مەزگىلىگە كىردى، چارۋىچىلار تۆل ئېلىش، بېقىش خىزمىتىنى تەرتىپلىك قانات يايدۇرۇۋاتقان بولۇپ، تۆگە سۈتىنى سېتىش چارۋىچىلارنىڭ كىرىمىنى ئاشۇرۇشتىكى يېڭى يارقىن نۇقتىغا ئايلىنىپ، شۇ جاينىڭ ئىقتىسادىي تەرەققىياتىغا ھاياتىي كۈچ قوشتى.

　خوشۇت ناھىيە ئۇششاقتال يېزىسى شورقۇدۇق كەنتىدىكى چارۋىچى لاڭسەي ئائىلىسىنىڭ چارۋىچىلىق مەيدانىدا، تۇغۇلغىنىغا ئاران 10 كۈن بولغان بوتىلاقلار يۈگۈرەلەيدىغان بولدى. لاڭسەي ئائىلىسىدىكىلەر بىلەن بىر تەرەپتىن ھىڭگاننى بوتىلاقلارنى ئېمىتىشكە يېتەكلىسە، يەنە بىر تەرەپتىن سۈت سېغىشقا باشلىدى.

　«بىزنىڭ ئۆيدە بېقىلىۋاتقان 200 تۇياقتىن ئارتۇق تۆگە بۇ يىل 30 تۇياقتىن كۆپرەك بوتىلاقلىدى، ھەر يىلى مۇشۇ پەسىلدە، مەن 20 تۆگىنى ساغىمەن، 20 تۆگىدىن 25 كىلوگىرامدىن 28 كىلوگىرامغىچە سۈت چىقىدۇ، ھەر كىلوگىرامىنى 50 يۈەندىن ساتىمىز»، دېدى خوشۇت ناھىيە ئۇششاقتال يېزىسى شورقۇدۇق كەنتىدىكى چارۋىچى لاڭسەي.

　لاڭسەينىڭ چارۋىچىلىق مەيدانى چۆللۈكنىڭ ئىچكىرىسىگە جايلاشقان بولۇپ، تۆگە يانتاق، قارىياغاچ، ياۋا تاۋۇز قاتارلىقلارنى ئوزۇق قىلىدۇ، تۆگىنىڭ پۈتۈن بەدىنى گۆھەر بولۇپ، تۆگە تىۋىتىنىڭ ھەر كىلوگىرامىنىڭ سېتىلىش باھاسى 60 يۈەندىن 80 يۈەنگىچە، ئىككى ياشلىق تۆگىنىڭ بازار باھاسى 7000 يۈەندىن 8000 يۈەنگىچە بولىدۇ. يېقىنقى يىللاردىن بۇيان، چارۋىچىلىق مەيدانىنىڭ قاتنىشى ياخشىلانغاچقا، سودىگەرلەرنىڭ زاكاز تالونلىرى ئۈزۈلمىدى. ھازىر تۆگە سۈتى ئەتراپتىكى ناھىيە، شەھەرلەردە بازار تاپتى، باقمىچىلىق كۆلىمىنىڭ سىجىل كېڭىيىشى، كىرىمىنىڭ سىجىل ئېشىشىغا ئەگىشىپ، لاڭسەينىڭ تۆگە باقمىچىلىقىنى تەرەققىي قىلدۇرۇش ئىشەنچىسى تېخىمۇ ئاشتى.

　«تۆگە سۈتى بەك ياخشى سېتىلىدۇ، تېخى ساغماي تۇرۇپلا، زاكاز قىلىنىپ بولىدۇ»، دېدى خوشۇت ناھىيە ئۇششاقتال يېزىسى شورقۇدۇق كەنتىدىكى چارۋىچى لاڭسەي.

　يېقىنقى يىللاردىن بۇيان، تۆگە گۆشى، تۆگە تىۋىتى، تۆگە سۈتىگە بولغان بازار ئېھتىياجىنىڭ مۇقىم ئېشىشىغا ئەگىشىپ، تۆگە بېقىش خوشۇت ناھىيەسىدىكى چارۋىچىلارنىڭ كىرىمىنى ئاشۇرۇشتىكى يېڭى يولغا ئايلاندى. (ئىختىيارىي مۇخبىرلار ياڭ جياجيا، ليۇ جياخەن)