سانائەت قوشۇلما قىممىتى بۇلتۇرقى ئوخشاش مەزگىلدىكىدىن %18.5 ئاشتى

　مۇخبىرنىڭ بايىنغولىن ئوبلاستلىق سانائەت ۋە ئۇچۇرلاشتۇرۇش ئىدارىسىدىن ئىگىلىشىچە، 2025- يىلى 1- پەسىلدە، بايىنغولىن ئوبلاستىدىكى توققۇز ئاپتونوم رايون دەرىجىلىك ۋە ئۇنىڭدىن يۇقىرى باغچە رايونى كۈچلۈك تەرەققىيات ئېلاستىكلىقىنى نامايان قىلىپ، «تۇنجى ئىشنى غەلىبىلىك باشلاش»نى ئىشقا ئاشۇرغان، سانائەت ئىقتىسادىدا «سەككىزدە ئېشىش، بىردە تۆۋەنلەش»تەك ياخشى ۋەزىيەت بارلىققا كېلىپ، سانائەت قوشۇلما قىممىتى جەمئىي 5 مىليارد 486 مىليون يۈەنگە يېتىپ، بۇلتۇرقى ئوخشاش مەزگىلدىكىدىن %18.5 ئېشىپ، يەرلىكنىڭ نېفىتتىن باشقا سانائەت قوشۇلما قىممىتىدە ئىگىلىگەن نىسبىتى %86.9كە يەتكەن، پۈتۈن ئوبلاستنىڭ سانائەت ئىقتىسادىنىڭ ئېشىشىغا تۆھپە قوشۇش نىسبىتى گەۋدىلىك بولۇپ، ئېشىش سۈرئىتىنىڭ 4.7 پىرسەنت پوئېنت ئېشىشىغا بىۋاسىتە تۈرتكە بولغان.

　1- پەسىلدە، چەرچەن، خوشۇت، يەنجىدىن ئىبارەت ئۈچ باغچە رايونىنىڭ ئىپادىسى كۆرۈنەرلىك بولۇپ، سانائەت قوشۇلما قىممىتىنىڭ ئېشىش سۈرئىتى بىردەك %30نى بۆسۈپ ئۆتۈپ، رايون ئىقتىسادىغا يېتەكچىلىك قىلىدىغان ئېشىش قۇتۇپىغا ئايلاندى. 3- ئايدىلا، پۈتۈن ئوبلاستتىكى ھەرقايسى باغچە رايونلىرىنىڭ قوشۇلما قىممىتى 1 مىليارد 984 مىليون يۈەنگە يېتىپ، بۇلتۇرقى ئوخشاش مەزگىلدىكىدىن %19.4 ئېشىپ، مۇقىم ئېشىش ۋەزىيىتى داۋاملاشتى.

　3- ئاينىڭ ئاخىرىغىچە، بايىنغولىن ئوبلاستىدىكى ھەرقايسى باغچە رايونلىرىغا ماكانلاشقان سانائەت كارخانىلىرىنىڭ ئومۇمىي سانى 928گە يەتتى، بۇنىڭ ئىچىدە، كۆلەمدىن يۇقىرى سانائەت كارخانىسى 219 بولۇپ، ئوبلاست بويىچە كۆلەمدىن يۇقىرى سانائەت كارخانىلىرى ئومۇمىي سانىنىڭ %69ىنى ئىگىلەپ، باغچە رايونلىرىنىڭ كەسىپلەر توپلاشقان ئاساسىي بازا بولۇشتەك مۇھىم رولى گەۋدىلەندى. سانلىق مەلۇماتتا كۆرسىتىلىشىچە، باغچە رايونلىرى بايىنغولىن ئوبلاستىنىڭ سانائەت ئىقتىسادىنىڭ سۈپەتنى ئۆستۈرۈپ ئۈنۈمنى ئاشۇرۇشتىكى يادرولۇق ۋاسىتىگە ئايلىنىپ، كارخانىلارنى يېتىلدۈرۈش، ئىشلەپچىقىرىش ئىقتىدارىنى قويۇپ بېرىش قاتارلىق جەھەتلەردە سىجىل كۈچ چىقارغان.

　بايىنغولىن ئوبلاستلىق سانائەت ۋە ئۇچۇرلاشتۇرۇش ئىدارىسىدىكى ئالاقىدار مەسئۇل يولداش مۇنداق بىلدۈردى: كېيىنكى قەدەمدە، خىزمەت مېخانىزمىدا يېڭىلىق يارىتىشنى تۇتقا قىلىپ، دىققەتنى كارخانىلارنىڭ ئېھتىياجىغا مەركەزلەشتۈرۈپ دەل جايىدا تەدبىر قوللىنىپ، كارخانىلارغا ياردەم بېرىش مۇلازىمىتى ۋە ئىقتىسادنىڭ ئايلىنىشىنى ئورۇنلاشتۇرۇشنى پۈتۈن كۈچ بىلەن ياخشى ئىشلەپ، باغچە رايونىنىڭ ئۇنىۋېرسال رىقابەت كۈچىنى يەنە يېڭى پەللىگە كۆتۈرۈشكە تۈرتكە بولۇپ، پۈتۈن ئوبلاست سانائەت ئىقتىسادىنىڭ يۇقىرى سۈپەتلىك تەرەققىياتىغا تېخىمۇ كۈچلۈك قۇۋۋەت قوشىمىز. (مۇخبىر جاڭ شياۋخۇڭ)