دېڭىز يىپەك يولىدىكى قىممەتلىك يادىكارلىقلار − «ۋەنجياۋ 1- نومۇر»لۇق چۆكۈپ كەتكەن كېمىدىن چىققان مەدەنىيەت يادىكارلىقلىرى كۆرگەزمىسى 4- ئاينىڭ 20- كۈنى كورلا خەلق ئۆرپ- ئادىتى مەدەنىيەت مۇزېيىدا باشلاندى.

　ئىگىلىنىشىچە، بۇ قېتىمقى كۆرگەزمىنى كورلا خەلق ئۆرپ- ئادەت مەدەنىيەت مۇزېيى بىلەن فۇجوۋ شەھەرلىك مۇزېي بىرلىكتە ئۆتكۈزگەن بولۇپ، 7- ئاينىڭ 20- كۈنىگىچە داۋاملىشىدىكەن. بۇ كۆرگەزمە «ۋەنجياۋ خادا تېشىنىڭ يېنىدا چۆكۈپ كەتكەن كېمىلەر»، «جاھاننى زىلزىلىگە سالىدىغان دېڭىز ئاستى فار- فۇر ئامبىرى»، «دېڭىز يىپەك يولى سەپىرى»دىن ئىبارەت ئۈچ قىسىمغا بۆلۈنگەن، چۆكۈپ كەتكەن كېمىلەردىن چىققان مەدەنىيەت يادىكارلىقلىرىنى كۆرگەزمە قىلىش ئارقىلىق، فار- فۇر بۇيۇملارنىڭ ئارقىسىدىكى تارىخىي مەدەنىيەتنى چوڭقۇر چۈشەندۈرۈپ، «ۋەنجياۋ 1- نومۇرلۇق» چۆكۈپ كەتكەن كېمىنى بايقاش، سۈزۈش ۋە قوغداش جەريانى بايان قىلىنغان. بۇ قېتىم كۆرگەزمە قىلىنغان 100دىن ئارتۇق فار- فۇر بۇيۇمنى فۇجوۋ شەھەرلىك مۇزېي چۆكۈپ كەتكەن 17 مىڭدىن ئارتۇق مەدەنىيەت يادىكارلىقلىرى ئىچىدىن تاللاپ چىققان. ئۇلار فۇجوۋنىڭ دېڭىز يىپەك يولىدىكى باشلىنىش پورتى ۋە يۆتكەپ توشۇش پورتى بولغانلىقىنىڭ مۇھىم گۇۋاھچىسى بولۇپ، قەدىمكى دەۋر كېمىسازلىق تارىخى، قەدىمكى ساپال بۇيۇملار تارىخى قاتارلىقلارنى تەتقىق قىلىشتا ئىنتايىن مۇھىم ئەھمىيەتكە ئىگە. 

　«بۇ  كۆرگەزمە ماڭا ئۇلارنىڭ شەكلىنىڭ ئىنتايىن غەلىتە، گۈزەل ئىكەنلىكىنى، چىڭ سۇلالىسى دەۋرىدىكى دېڭىز يىپەك يولى سودا كارۋانلىرىنىڭ ئىنتايىن گۈللەنگەنلىكىنى ھېس قىلدۇردى»، دېدى كورلا شەھەرلىك 1- ئوتتۇرا مەكتەپ 9- يىللىق ئوقۇغۇچىسى ئەزىمەت ئەبەي. (مۇخبىر ۋۇرۇنچىمىك)