ئانار بۇلۇت \ شىنجاڭ گېزىتى خەۋىرى (مۇخبىر ۋاڭ لىخۇا فوتوسى، خەۋىرى) 4- ئاينىڭ 19- كۈنى، كورلا شەھىرىنىڭ قارايۇلغۇن بازىرى تەسكەن كەنتىدىكى خاۋشياڭ شاپتۇللۇق بېغىدا، رەڭدار شاپتۇل چېچەكلىرى بەس- بەستە ئېچىلدى، ساياھەتچىلەر شاپتۇل دەرىخى ئاستىدا سەيلە قىلىشتى، شاپتۇللۇق بەئەينى گۈل دېڭىزىغا ئايلانغان بولۇپ، سۈرەتتەك گۈزەل تۈسكە كىرگەنىدى.

　شۇ كۈنى، كورلا شەھىرىنىڭ قارايۇلغۇن بازىرىدا 4- نۆۋەتلىك شاپتۇل چېچىكى ساياھەت پەسلى پائالىيىتى داۋاملىشىۋاتقانىدى. ئەدەبىيات- سەنئەت نومۇرلىرى، شاپتۇل چېچىكىنى تاماشا قىلىش، ياۋا كۆكتات كولاش، يېزا- كەنتلەرنىڭ مەززىلىك تائاملىرىغا ئېغىز تېگىش قاتارلىق مول مەزمۇنلۇق شاپتۇل چېچىكى پەسىلى ساياھەت پائالىيەتلىرى ئۆتكۈزۈلۈپ، ساياھەتچىلەرگە يېزا- كەنتلەرنىڭ ئۆزگىچە جەلپكارلىقىنى چوڭقۇر ھېس قىلدۇردى.

　كورلا شەھىرىدىكى 5800 مو يەردىكى شاپتۇل دەرەخلىرى ھازىر راسا چېچەكلىدى، چېچەكلەش مەزگىلى ئون كۈن ئەتراپىدا بولۇپ، ھەر قېتىملىق چېچەكلەش پەسلىدە، نۇرغۇن ساياھەتچى ۋە شۇ جايدىكى ئامما بۇ يەرگە كېلىپ سەيلە- ساياھەت قىلىدۇ ۋە چېچەكلەرنى تاماشا قىلىدۇ.
　كورلا شەھىرى يېقىنقى يىللاردىن بۇيان شاپتۇل ئۆستۈرۈشنى زور كۈچ بىلەن تەرەققىي قىلدۇرۇپ، شىرنىلىك شاپتۇل، توقاچ شاپتۇل قاتارلىق خاس شاپتۇل تۈرلىرىنى تىكىپ، ئۇنى شۇ جايدىكى دېھقانلارنىڭ كىرىمىنى ئاشۇرۇپ بېيىشىدىكى يارقىن نۇقتىغا ئايلاندۇردى.