ئانار بۇلۇت \ شىنجاڭ گېزىتى خەۋىرى (مۇخبىر ما يىنىڭ) «1- ماي»لىق دەم ئېلىش مەزگىلىدە، شىنجاڭ ئايرودۇرۇم (گۇرۇھ) چەكلىك مەسئۇلىيەت شىركىتى جەمئىي 701 مىڭ ئادەم قېتىم يولۇچى توشۇش، 3558.9 توننا يۈك، پوچتا يوللانمىسى توشۇشنى تاماملاپ، 6210 ئايروپىلان قېتىم ئۇچۇش- قونۇشقا كاپالەتلىك قىلدى، بۇ، بۇلتۇرقى ئوخشاش مەزگىلدىكىدىن ئايرىم- ئايرىم ھالدا ％13.1، ％38.7، ％14.4 ئېشىپ، تىرانسپورت ئىشلەپچىقىرىش مىقدارىدا كۆرۈنەرلىك ئېشىش ۋەزىيىتى كۆرۈلدى. بۇنىڭ ئىچىدە، ئۈرۈمچى تىيانشان خەلقئارا ئايروپورتى 366 مىڭ ئادەم قېتىم يولۇچى توشۇش، 2881.6 توننا يۈك، پوچتا يوللانمىسى توشۇشنى تاماملاپ، 2585 ئايروپىلان قېتىم ئۇچۇش- قونۇشقا كاپالەتلىك قىلدى، بۇ، بۇلتۇرقى ئوخشاش مەزگىلدىكىدىن ئايرىم- ئايرىم ھالدا ％2.4، ％43.8، ％1.6 ئاشتى.

«1- ماي»لىق دەم ئېلىش مەزگىلىدە، پورتتىن چىققان يولۇچىلار پورتتىن كىرگەن يولۇچىلاردىن سەل كۆپ بولدى، شىنجاڭ ئىچىدىكى ئاۋات شەھەرلەر ئاساسلىقى قەشقەر، غۇلجا، كورلا، ئاقسۇ، خوتەن قاتارلىق جايلار بولدى. 5- ئاينىڭ 1- كۈنى، شىنجاڭ ئايرودۇرۇم گۇرۇھى يولۇچىلار يۇقىرى پەللىسىنى كۈتۈۋالدى، يولۇچى توشۇش مىقدارى بەش كۈن ئىچىدە ئەڭ يۇقىرى بولۇپ، 148 مىڭ ئادەم قېتىمغا يەتتى.

بۇ يىل، شىنجاڭ ئايرودۇرۇم گۇرۇھى ئالتاي- شاڭخەي پۇدۇڭ، تۇمشۇق- قومۇل- شىئەن، كورلا- چۇڭچىڭ قاتارلىق كۆپلىگەن ئاۋىياتسىيە لىنىيەلىرىنى ئېچىپ، ئەسلىگە كەلتۈرۈپ، «1- ماي»لىق دەم ئېلىش مەزگىلىدىكى يولۇچىلارنىڭ سەپەرگە چىقىش ئېھتىياجىنى قاندۇرۇپ، شىنجاڭنى دۇنيادىكى مۇھىم ساياھەت مەنزىلگاھى قىلىپ بەرپا قىلىشقا كۈچ قوشتى. يولۇچىلارنىڭ ئىللىق، قولايلىق سەپەرگە چىقىشىغا كاپالەتلىك قىلىش ئۈچۈن، شىنجاڭ ئايرودۇرۇم گۇرۇھى يالغۇز سەپەرگە چىققان بالىلارغا دائىر سەپەرگە چىقىش تەدبىرى ۋە ئايروپىلانغا ئولتۇرۇش بىخەتەرلىك تەكشۈرۈشى ئەسكەرتمىسىنى رەتلەپ، ھەرقايسى ئايرودۇرۇملاردا «1- ماي» خەلقئارا ئەمگەكچىلەر بايرىمى باش تېمىسىدىكى مەدەنىيەت پائالىيەتلىرىنى قانات يايدۇرۇپ، قويۇق بايرام كەيپىياتى ياراتتى.