6- ئاينىڭ 10- كۈنى، شىنجاڭ تېببىي ئىلىم جەمئىيىتى سۈيدۈك ئاجرىتىش كېسەللىكلىرى كەسپىي كومىتېتىنىڭ «داۋالاش بىۋاسىتە ئاپتوموبىلى» پائالىيىتىگە قاتناشقان تېببىي خادىملار پىچان ناھىيەسىگە بېرىپ، مەزى بېزى راكىنى دەسلەپكى مەزگىلىدە تاسقاپ تەكشۈرۈش، ھەقسىز كېسەل كۆرۈش پائالىيىتىنى قانات يايدۇردى.

　بۇ قېتىمقى پائالىيەتكە ئاپتونوم رايونلۇق خەلق دوختۇرخانىسى ۋە تۇرپان شەھىرى (ھەرقايسى رايون، ناھىيەلەر)دىن كەلگەن سەككىز نەپەر سۈيدۈك ئاجرىتىش كېسەللىكلىرى مۇتەخەسسىسى قاتناشقان بولۇپ، شۇ جايدىكى ئاممىنى ھەقسىز كېسەل كۆرۈش، ساغلاملىق بويىچە مەسلىھەت بېرىش ھەم مەزى بېزى راكىنى دەسلەپكى مەزگىلىدە تاسقاپ تەكشۈرۈش مۇلازىمىتى بىلەن تەمىنلەپ، ئەلا سۈپەتلىك داۋالاش بايلىقىنى ئاساسىي قاتلامدىكى پۇقرالارغا يەتكۈزدى.

　ھەقسىز كېسەل كۆرۈش نەق مەيدانىدا، مۇتەخەسسىسلەر ئاممىنىڭ كېسەللىك تارىخىنى سەۋرچانلىق بىلەن سوراپ، تۈرلۈك سۈيدۈك ئاجرىتىش كېسەللىكلىرى توغرىسىدىكى سوئاللارغا جاۋاب بەردى، بولۇپمۇ مەزى بېزى راكىنىڭ ئالدىنى ئېلىش، تاسقاپ تەكشۈرۈش ۋە داۋالاش مەسىلىلىرىگە قارىتا كەسپىي ساغلاملىق يېتەكچىلىكى بىلەن تەمىنلەپ ۋە داۋالاش تەكلىپى بېرىپ، «بالدۇر بايقاش، بالدۇر دىياگنوز قويۇش، بالدۇر داۋالاش»تىن ئىبارەت ساغلاملىق قارىشىنى تەشۋىق قىلدى. پائالىيەت باشلىنىشتىن ئىلگىرى، ئاپتونوم رايونلۇق خەلق دوختۇرخانىسىدىكى مۇتەخەسسىسلەر بىلەن پىچان ناھىيەلىك خەلق دوختۇرخانىسىدىكى تېببىي خادىملار كېسەللىك مىساللىرىنى چوڭقۇر مۇھاكىمە قىلىپ ھەم تەجرىبە ئالماشتۇرۇپ، تىپىك دىياگنوز قويۇش، داۋالاش مىساللىرىنى ھەمبەھرىلىدى.

　«داۋالاش بىۋاسىتە ئاپتوموبىلى» تۈرى قوزغىتىلغان تۇنجى ناھىيە دەرىجىلىك پائالىيەت بولۇش سۈپىتى بىلەن، بۇ قېتىمقى پائالىيەت ئاساسىي قاتلامدىكى ئامما ئۈچۈن قولايلىق، يۇقىرى سەۋىيەلىك داۋالىنىش سۇپىسى ھازىرلاپ بېرىپلا قالماي، ئەلا سۈپەتلىك داۋالاش بايلىقىنىڭ ئاساسىي قاتلامغا چۈشۈرۈلۈشىگە ئۈنۈملۈك تۈرتكە بولدى ھەمدە ناھىيە دەرىجىلىك داۋالاش ئاپپاراتلىرى بىلەن يۇقىرى دەرىجىلىك دوختۇرخانىلارنىڭ زىچ ھەمكارلىشىشىدىكى يېڭى يولنى ئاچتى، شۇنداقلا ناھىيە رايونىنىڭ داۋالاش مۇلازىمەت ئىقتىدارىنى يۇقىرى كۆتۈرۈپ، ئەلا سۈپەتلىك داۋالاش بايلىقىنىڭ تەكشى ئورۇنلاشتۇرۇلۇشىغا تۈرتكە بولۇپ، «ساغلام شىنجاڭ» بەرپا قىلىش قۇرۇلۇشىغا كۈچ قوشۇشتا مۇھىم ئۈلگە كۆرسىتىش ۋە يېتەكلەش رولىنى ئويناپ، كەلگۈسىدىكى «داۋالاش بىۋاسىتە ئاپتوموبىلى» پائالىيىتىنىڭ چوڭقۇر قانات يايدۇرۇلۇشى ئۈچۈن ياخشى ئاساس سالدى. (مۇخبىر جاڭ كۇن خەۋىرى، فوتوسى)