ئانار بۇلۇت \ شىنجاڭ گېزىتى خەۋىرى (مۇخبىر جوۋ پېڭ فوتوسى، خەۋىرى) 6- ئاينىڭ 25- كۈنى، «يۇقىرى سۈرئەتلىك تاشيولنى بويلاپ شىنجاڭغا نەزەر» زىيارەت ئۆمىكى ليەنيۈنگاڭ- قورغاس يۇقىرى سۈرئەتلىك تاشيولى (G30)نى بويلاپ سايرام كۆلىگە كەلدى. «ئاتلانتىك ئوكياننىڭ ئەڭ ئاخىرقى بىر تامچە كۆز يېشى» دەپ نام ئالغان بۇ سېھىرلىك ماكاندا سۇ كۆپكۆك ھەم سۈپسۈزۈك بولۇپ، قارلىق تاغ ۋە بۇلۇتلارنىڭ سايىسى سۇ يۈزىدە ئەكس ئېتىپ تۇراتتى، كۆل بويىدىكى يايلاق خۇددى يېشىل گىلەمدەك يىراقلارغا سوزۇلۇپ، گۈللەر باشلىرىنى ئىرغاڭلىتىپ، ياز پەسلىدىكى كىشىنى مەپتۇن قىلىدىغان كۆك رەڭلىك گۈزەل مەنزىرىنى ھاسىل قىلغانىدى.

　ھازىر، سايرام كۆلى مەنزىرە رايونىنىڭ قاتناش ئەسلىھەلىرىنىڭ دەرىجىسى ئۆستۈرۈلۈپ مۇكەممەللەشتۈرۈلدى، مېھمانساراي، ئاپتوموبىل توختىتىش مەيدانى قاتارلىق يۈرۈشلۈك ئەسلىھەلەر قۇرۇلۇشى تېزلىتىلدى. پىرىستاندا يەلكەنلىك كېمە ھەيدەش، تۆۋەن ھاۋا بوشلۇقىدا ئۇچۇش قاتارلىق يېڭى كەسىپلەرنىڭ تۈرتكىسىدە، ئەنئەنىۋى گۈزەل مەنزىرە بىلەن يېڭى ئېقىمنى ھېس قىلىش ئۆزئارا گىرەلىشىپ، ساياھەتچىلەر كۆرۈش سېزىمى بىلەن ھېس قىلىشتىن ئىبارەت قوش زىياپەتتىن قانغۇچە ھۇزۇرلاندى.